Jan 10 – Tabme J’on!

“Dudai j’on sanaruman aman rapti angnurte, bar janang kuddub mana j’onji sanang-len adam daku. E tanimyim mar-hen, aman abmele dile janab janattidage papwr do tabme j’on dakkulai” (Solomon a Kanen 7:13).

Kitungle kuddub tabme abmete. Er j’onon maranji a d’ong j’onon maranji amangba abangjingte. Bar Anin asang j’onji ragal j’onban abanjingte bangsa j’on atiyben abmele.

Ogandile gijba amben agule aneeban janonglingben ate. amben a oskaite janongan, neebanji aguben abmele, bangsa solan atiyte, d’an rule bangsagam asagalte. Asui mihnum atiki, neebanji raduloge marangteji do aj’oben susuteji. Bar kun j’onji gijan gijle man’oihben adkadabne. Amben m’oihling adakute neebenji a j’on gijle bigardanji aneeb saring.

Kun ambrij, Kitungan janang saite mangben saring a j’oben. Angante bo luaneban bo janonglingan dakule do adj’oad, aguneblen amandran kun luaneeban aidben asan oskailen. Kun ayam lingan ogandile, enjuman ababneban dakule. Bindo janongan aturturmar gamle gunebmaran a d’ong, do bo mihnum agijba gamle. Kun neban bo mihnum abmele l’ule, kun neban bo janonglingan adakulen asan do tanurturmaran a oblinglen asan.

Bindo bogad kun neban atanurtur mar adakulenden, kun anangan saring adrablenden. Angante Gamangtungan gamete “Anin dungdamd’aban a guneb aran ambrij; anin hadab ayam lingan j’on j’ote, do a olan baldedle adnasarre. Do itente anin lumte antate ojoraite” (Sanenken 1:3).

Bibolan gadlamlangten: “Bar alon a kodi kota manengban janumjuman apsele kuddub janab j’o-neban dete. kun nebanji a olan baldedle adruyole orde a j’on aggalue. D’an sarebasingan saring dungten asan kun nebanji di anggai j’on j’ote bar anta j’on janumjuman apsele do anta olan sanamangan apsele dete” (Ejekiel 47:12).

“Bindo Janggardan a j’on tanimyiman, man’oihan, sanabyun, atengayam sanaiyen, asuyeman, banangsan, dernan, lanagadan, ladladj’edamnan, kani a baran a dangdangben asan iteja a banaih anosaijan agassa” (Galatianji 5:22-23). Kitungan a pasijanji, kanina Kitungan aitsuman Janggardan a j’on.

Okiy Kinolbe absele: “Anten asan Anin batte dile tordong Kitungan amangban sanensen ge kanuban, manan, Anin ahiman abpengbatenan‘a usaltaman a j’onji na a pangtiyba” (Ebri 13:15).