Jan 07 – Tabme Banaih-beran!

“Bar janang Anin amang lingan do mang-ling-ben itente a banaihan jardi dele, ettegoi aboi tabme banaihan hen idoltaben, iten asan gamlenden lungudan anabsangaijan takkudroite, bar janardi panaledan andreng puangle.” (1 Jon 2:8).

Anappai Pol gadlamlangten Tabme Banaih beran abmele. Angante amben tabme banaih-beran ambrij ahaten, kuddub mandrengnaben bartabmete. Lanumudan sagaite do panuangan yirtai. Ajardin-na, tabme banaih-beran tabme panuangba urunglangten.

Papwr banaihberan Israelanji a d’ong Mojes batte taniyan dele. Aninji amandrengnanji bo bigarda ambrij dele, duaihdam do murmur-akoramarji deleji. Aten asan kun mandranji a d’ong anosaij-lingan do banaihberlingan, butente a purba denna-lingan idjaja anosaijan adakuad do boantanji. Kan kuddubanji galji banaihberlingan panangan deleji kun batte abhananaben dele. Aninji kun anosaijan do banaihberan batte anabtagoran deleji. Aninji abmanilenji asan kan ambrij banaihberan ganabdilan dele, anangan janang sandungetenji.

Bindo angante anlen tabme anosaij-lingan yirraibe, Gamangtungan Jisun tanimhiman a banaiberan tiyaiten. Galji banaihberan sadan sadle, Gamangtungan kan bagu sattang banaihberan mukkabalen dakkueten. Anab-boi timhimba Kitungan a d’ong kuddub uggarben do pwrarda batte. Anab-bagu ate, toitoisinmarben timyimba egale d’ongdamben atimyimte. Kani na ate tabme banaihberan do tabme anabhanghangan.

M’odan saring m’odan, j’in ate j’inna do mandrengnan do mandrengna na papwr anosaijan. U’ante tabme anosaijan hanghanglangten asangem-maranji a d’ong atimyimben abmele do amben daman gamle. Asangem-maranji abmele garberba gamte Kitungan.

Angante amben Kristun amangba ayirtai, amben bigarda banaihberan adaneling adakuben bindo tanimyim dane-lingan dakutaben. Bigardanji atimyimtaben baralen-na. ogandile gijba Jisun a tanimyiman mangbaben. Do amben janang bigardanji atimyimben dete.

Kitungan a pasijanji, amben nami tabme banaiber-lingan daku. Kristun gabdille anosaijan anlen ampara. Anin apsele anlen ganugu do panemengan batte anosaijan danakkun dele. O’ai sandranle anbgugun batte do Gamangtungan Jisun senkenraba, bo surda atanimyiman batte.

Okiy Kinolbe absele: “Gijba, angante Hen Israel a birindan apsele do Judan a birindan apsele bo tabme analsibdaijan tabngijtai, kun ayaman yertai, gamte Gamangtungan.” (Ebri 8:8).