Jan 05 – Tabme Janggardan!

“…Hen aninji alung lingan aboi tabme janggardan dakkutai; bar aninji a d’ongan saring arengdage a uggaran taban table, aninji a d’ong jeludage a uggaran tiytai” (Ejekiel 11:19).

Kristu mandrengna aboi radu mandrengna, itente tabme lanuman abaran hangtabe. Bibolan gamte: “Bo tabme uggaran Hen d’ong-ben tiytai, do alung-ling-ben bo tabme janggardan Hen dakkutai, bar Hen d’ong-ben saring arengdage a uggaran table, d’ong-ben jeludage a uggaran tiytai” (Ejekiel 36:26). Uggar-ben a rikka dakudongete, bindo tabme janababan batte Marid Janggardan barij deben dete.

Ogandile agijba bo glaso-lingan biso ragaman barij daku. egjanang amben atableja kun ate kotin dakutena. Bogad amben angante arite kuddub bairan sikkoija dunglen yirte, abadrijben apsele d’an batte dete. angante d’an batte badrijtabe a erbangsa gas dunglen yirte. Kun ambrij, angante amben a hangte tabme janggardan, kuddub er maridben dunglen yirte, do tabme uggaran gabdilete manglingben.

Monaben a rikka a dakuben boi boi jugardamdam. Anablun ayamling, ateng akurlangtenanji a janggarda dakute do alungan saring dunglen yirteji. Gahilan, gamudnan, bandraban, murmurnan orde alung-lingan saring dunglen yirteji. Angante dunglen yirteji mangben saring, amben Marid Janggardan do Kitungan a Tanurdun uggarlingben do j’e-lingben barij deben dete.

Jisun gameten: “Angante er marid kulman mandran saring dungte, seletten anin lulunan a hangben asan saijle saijle d’an arikka darakunaban yerte, bar antate adhange. Seletten anin gamte, Ayengan a s’ingan saring dunglenai, tetten na daiyarte. Bar iyan iyle antate arikksing, anjanojo tanamtaman dele, gamle anin gijte. Seletten anindam saring jznjzn duaihan a delen a gulji bzgarda kulmanji a d’ong itte urunge. Bar ganan ganle aninji tetten dakutenji. Bar anta mandran abmangan saring tiki jznjzn eldage dete. Ettegoi na kan duaih arsangkud maranji a d’ong dete.” (Mattiu 12:43-45).

Kani-na ate sanaisai Marid Janggardan batte anabhanan adeben dete janababan batte, adtapdong anablu batte. Anablu uggaran amandran Kitungan a ganankil-lingan a surpidben dete do Marid Janggardan a s’i-lingan surpidnaben dete. Kitungan a Pasijangji, amben a m’oihben sanaisaited itente janababan adele, bindo baraling ateng pwradanji hangle do bo banangsa janababan a urungben dete, Marid Janggardan a sanayam batte.

Okiy Kinolbe absele: “Bar kun a tiki Hen kuddub mandranji a lanangka Janggarda-Hen lale tiytai. Seletten onggaron-benji do ansalo-on-benji tungmadgijberan oblengteji, talaiba mar-benji ganumten gijteji do danggarda mar-benji tanalmadan gijteji” (Joel 2:28).