Jan 04 – Tabme Garanganan!

“Anten asan, e buhanganji, Jisun danangdangkaban, manan, a d’ongan batte itente a tabme do am’engdam tangoran anlen apsele oskaieten, anta tangor lingan Jisun a mihaman batte jznjzn marid darakuna lingan a ganben asan anlen a uywban delen asan” (Ebri 10:19-20).

Kitungan-na Tabme garangangodan erahid mandrengnaban a tagoran. Angante amben tabme garangan-lingan marid darakunaban a gante, amben gijle arabtite Kitungan a ganugu, madben batte gijle arabtite a ganugu panemengan.

Tabme garanganan aganben apsele tiybenten, Kitungan a d’ongan sanle tagoran rile, itente anurdage a tagoran. Kuni-na ayam a d’ongan tiydamneten arakadang-lingan, sarebasingan a garanganan bandaneten lanankaban saring ordarban. Kan batte, anansan dele marid darakuna do jznjzn marid darakuna, anodsadan dele. Kan ate Kitungan lumle, anten asan amben Kitungan a ganugu ahangte jznjzn marid darakunaban saring, do amben apsele gugudage adarakuna a galamben asan.

Bo denna Sadhu Sundar Singh amaina-mar oalle, “Iten ambrij orde aradmaina adakue Kristu-lingan? bogad amben a oblingte, kan ambrij dorma-ling-len daku gamle absuitam.” Sadhu Sundar Singh sanabyun batte abyer-beraten, gamle, “Iteja dorma agasa orde tagoran agasa tanimhiman do Jisun akubdamneten ambrij. A d’ongan batte garangan a tagoran gadile bo tabme do gugudage Kitungan amangba agarangan. Kun ambrij dernaben dakupo?”. Bo mandran kan ate amdangle atikki adnadyerberan.

A purban anappai Pol, endran Kristunen adnang, a dorma apsele anin boi boi radu mar dakule. Do a dorma a berna ling, a sanengsengan amandrengna lingan Kristunji abs’idben do sarebes’ingan abs’idben.

Bindo egale anin yiraiten Damasikaba, Kitungan a ganugudage a tan’ar amang-lingan yiraiten. Anin gunle do oale, “Buten aman, Kitung?” kun batte Pol a mandrengnan bandaneten ataramtaman do tabme mandran gadile. Kunin as’i batte sarebasinganji abs’idle, nami kun as’i batte sarebas’ingan gutulle. Gamangtungan handramle ranapti batte kambolanji a idolben sarebasingban.

Kitungan a pasijanji, man’oihan batte tabme garanganban a d’ongan saring ganabdilan dele, kunina ate tagoran.

Okiy Kinolbe absele: “E buhang Sol, gijgijna do Marid Janggardan barijamte, gamle ayengan a Gamangtung Jisun tangor lingan aman a iylaian adnang mangba-nam abgijdamneten, Anin na d’ong-hen mangba-nam appai-ihten” (Anappai 9:17).