Jan 03 – Tabme Tangoran!

“kanate galamete do, butente pintu maran a godan a anardodan saring abyarte, anin karahidan saring bo pwrardan rabrabte, do ateng pintunji rubrubte” (Jakuban 5:20).

Kan a karda-lingan, Kitungan a oblingte a berna er tarungnagod lingan a hatenanji a mandranji abmele. Ayengan amandranji er tarungnagod lingan hatenji a tanakud lingan aninji bo surda kanalkal-lingan galuteji. Bo tagor sattang andangtaben hanahang batte ted, tabme uggaran, Janggardan do tabme kaninan. Ayengan amandranji er tarungnagod lingan a hatenanji apsele rojolgod dete do Jisun amangba adyertenaiji, bertenji tabme bangsa hanangan abmele, do bartabmeben abmele sayamte.

Angante amben agijgijte Daudo amandrengna, anin alumle a er bangsa baran apsele, do kuddub anogalan, do eragijle ambrij dele. Anin pintun lumle bigarda-mar a itslon batte, do kun mandran a d’ong kabhidle, a dukarin apanben asan do jundardan baran lumle. Bogad anin kun ambrij lumle dakunetenden a tanakud lingan aninbeih bo surda sanihdan dete badihben. Bindo Nathan tumadgijmar adnumdengad kun ambrij. Anten asan, angante Daudo anson dakule, anin bangsale adganlu oblingle do anin galamle a pintun mandrengna apsele, ongalan adyeraiten.

Atikki sanenken Daudo idol-le, bo lippan abt’arte ambrij dele, nami janang, ateng mandranji ayengan a s’idlingji amandranji. Kun batte aninji a d’ong sayamle Kitungan ampara a dakunaben apsele. Kani na ate murda-dam Kitungan amang yerlenaihen asan, Anin ganugudam do sanayamdam kuddub pintunji atabmadben asan do tabme mandrengna a tiyben abmele.

Bo itslon dakule, man’oihan batte sidrunglen bagu pasijanji batte, pintu lingan galule do a tanongban joldale. Angante a tanongba galamle a sidrungneten ate, anin a kadhid-damnaben oskaineten. Kun ayamlen, Kitungan a suyum adakulen asan a boantan apaile tanimyimberan a oblingben asan. Kun itslon adyerj’e-ling, a pintun pengbale do yerlenai kitungan amangba. Kitungan a tanongba a d’ong janang gudingle do jale ganugu batte. Kun a dennan saring, a mandrengna bandaneten man’oihan do sanabyun batte.

Kitungan a pasijanji, kan kuddauban mandrengna a kanalkalanji saring, Kitungan timyimlangten erobjongdage batte. Ayengan amandranji adyerj’e-tenji aninji a d’ong Kitungan jate. Anin asuyumdam do tabme a suyuman batte barij abmelangten. Anin ayengan amandranji yertenaiji aninji a d’ong jate maddan batte, do tabme tagor-lingan abtagorte.

Okiy Kinolbe absele: “Bindo nami pintun saring anuran hangan hangle, bar Kitungan a boantanji a delen asan amben manarid a deben a j’on, bar a tanakud lingan er ahidan a amandrengnan a hangte” (Romi 6:22).