Dec 31 – KITUNGAN RUBMANGDAGEN A BARAN LUMTE!

“Anten saring Josua mandranji a d’ong gameten, Ambendaman abmaridnaba. Iten asan gamlenden biyo Gamangtungan mang-ling-ben rubmangdagen a baran lumte” (Josua 3:5).

Amben pede bangsale abhanale papwrmihnum lingan, ogandile gijba do mandrengnaben sabrinaba. Kani na royongan daku tabme mihnum lingan oskaile a yirben abmele, do Kitunglingan surpid-damlen ayirben dete.

Kitungan d’ongben absittate kan tabme mihnum lingan, do mukababen haling yirte. A rubmang baran batte barij tardangge abmebenten. Do amben oskailen do anabsittan ahangben asan do rubmang baranji ahangben dete.

Josua a gameten a berna a ogandiba: “Ambendaman abmaridnaba. Iten asan gamlenden biyo Gamangtungan mang-ling-ben rubmangdagen a baran lumte.” (Josua 3:5). Iten a rubmang baran lumte amang linganji? Iten ambrij a rubmang baran sanasai dakule Israel maranji amanglen? Kinanzban ayirben abmele aninji Jordon jorda a padben dele. Jordon jorda apadben adnang aninji bo surda panadan apadben dele d’a-lingan, bo surda radu d’a lingan bar surda sanumaranji, kun d’an batte. Angante kun ambrij, yangam inslonji do passijanji aduleji kinanzban?

Bindo angante Israel maranji abmariddamlenji, Kitungan rubmang baranji lumeten. Angante Jordon jorda lingan halingji, d’an a suile kaddabneten. D’an kad-dabneten, bo tagoran gadilele apadben asan.

Angante sanenken lingan Daudo agameten ambrij aberna, kan jorda abmele. “Iten ambrij dele, E ganung, kunina ate? E Jordon, amang adyerle?” (Sanenken 114:5,6). Nami ogandiba iten gambenten kun jorda d’ongben kan ambrij a berrnaling! Bogad-den jorda gamte: “Kitungan a mandranji yangan Hen tagoran adtiyai? Anin na d’onghen gabdilih hen dernadage adeben dete. kan ate itsumhen Kitungan amandranji kznaniba ayirben dete.”

Tanahimdam Kitungan a onagji, Anin surda baranji alumben itsumte manglingben, angante amben abmarid-damten. Anten asan, abmarid-damnaben sanaisai nami do bo surda baran agijte tabme mihnum lingan.

Okiy Kinolbe absele: “Anin satta surda rubmang baranji lumte, iten asan gamlenden Anin asuyeman er ahiddam” (Sanenken 136:4).