Dec 28 – KITUNGDAGE A BANANGTONG!

“Dernan batte Noa itente endrang gittae, antabmele Kitungan saring hanangkilberan hangan hangle banantongan asan a s’ing maranji a d’ong a rabrabben apsele aboi d’asingan oskaile sabajaeten” (Ebri 11:7).

Kitungan a banantongling Noa a dakuneten asan Kitungdage a banangsa yiraiten. Anten asan, Kitungan a banantong, anin gabdelle bungsangan anin do a birindan abluben asan, kan abmele Kitungan anabsui danangrab.

Banantongan bagu manengban baraten. Banantongan bangsadam do ganutuldam. Orde mandran a d’ong san’idan saring ablute. Jajinganten abanantongan daku janardigod urunglangten. Do jajingante a banangtong ate, karahidan, anabs’idan, bimbiman pangtai.

Arobjongberan, bo hangna sijang bantongte porikyan a idolben abmele, ateng ayam a kinolnaben asan. Passijanji a u’anji a d’ong batongteji, danuaih lingan adhirengji ambrij aninjidaman. Itente bo posimaran amang saring rojoldam bo arasun saring, parosinji madridle baraten.

Kun ambrij, mandran butente banantong lingan haten, sonuman saring do pintun saring sagai dakutenji. Bo tonanan dernan batte gamle: “Hanangmar, ruangan aganben itsumhen daku do togi-s’ing-lingan banantong-hen daku, pintun-henji madridle marid mandrengnan adhanaben itsumtai.”

Noa Kitungdage anablun hangle, kan ganuran do ordaran a san’idan saring. Kan kuddub anabs’idan saring, anin bungsangan gabdelle anindaman do a birindan abmele, bo surda surpitdamna batte. Yan abangsan Kitungan a banantongan batte anin do a birindan ablule!

Okij aboi banantongan daku. Kitungan a d’ong er bantonglabe, jajingante amandranji sonuman do pwrpwr-lingan antanolbad dakuji, orde toneij-lingan do lanumud-lingan dakutenji, bubudanji do lamnabudanji. Butente ate bangtongteji iten jumai iten gahai orde iten jijinai gamle. Anegoi a banantong Mandan a d’ong abs’ite. Angante amben Kitungan a jingban surpidba, Madrid-damnaba Jisun Kristun a mihaman batte, do marid mandrengnan abhananaba, eteden iteja banantongan adhirai mangbaben.

Tanahimdam Kitungan a onagji, itejananling abantongdong orde manglingben itejanang yiraite-janang. Bindo Kitungan a banantong lingan dakunaben dete. Kitung-lingan raduloge dakunaba do bantongba. Jisaya tumadgijmar gamte: “Gijba Kitungan anablu-hen; hen dertenai do abbantongai. Iten asan ganlenden Jioba ranapti-hen do kanen-hen do Anin anablu-hen dele.” (Jisaya 12:2).

Okiy Kinolbe absele: “Tanimyim lingan iteja banantongan agassa, bindo hadab tanimTanimyim lingan iteja banantongan agassa, bindo hadab tanimyiman banantongan absangaite, iten asan gamlenden banantongan panadradan ampara maiten, bar butente bantongte, anin tanimyim lingan hadabloge addead” (Jon 4:18).