Dec 27 – Isor tu kinika ase?

Luke 19:3 tai Jisu ke sabole mon asile, hoilebi manukhan  nimite sabole napara hoishe kile koile tai bisi khata ase.

Bishi manu alag alag koi jitya taikhan ke hude: “Isor kinika ase?”  Hoilebi mon bhitorte tai khan sob nijor kiba karon nimite inika bhabna thaka hobo. Ekta Isor laga manu ekbar koishe ki Isor tu: electric current laga high voltage nishina ase, aru apuni khan bi tai logote kam kuribo lage. Aru judi apuni khan alag hoi  toh electric current tu  apuni ke phelai dibo.” Bishi mon harai diya nimite itu manu tu inika bhabna thakishe.

Aru alag manu ekjon koishe: “juntu homoi te ami Isor ke bhaban kure, ami nijor ke biya kura khan yaad ahe. Aru ami bishi bhoi lage tai ami logote ki kuribo ami mura pichete. Ami nijor ke komjur bhabna kure tai laga agete.” Itu bhabna Isor laga tu tai laga paap thaka nimite ase. Aru itu nimite hi tai dangor hobo paranai.

Aru ekta alag manu  thakishe, jun hi Isor laga naam pora bishi gussa hoi jai. Tai hodai hude: “judi Isor ase, kile iman khun kharaba ase, aru manu iman mure, nahoilebi kile iman judho khan hoi?” itu tu kile koile tai judho te tai laga ama baba ke haraishe, jitya tai bishi jawan  thakishe aru itu pora hi tai laga mon bikhai dishe Aru itu pora hi tai ke Isor janibole rukhaishe.

Aji laga pobitro kotha purile ami khan pai ki kinika zacchaeus rasta bisari thakishe Jisu ke janibole nimite. Aru kile koile Jisu laga morom pora taike chuishe, tai bishi bodli hoishe. Tai ki hoilebi dibole thakishe Jisu ke sabole nimite aru tai laga mon te rakhibole nimite. Tai nijor lag sob tu di kene hoilebi Isor laga usor te ahibole mon thakishe. kilekkoile Isor bi pobitro thakishe, tai nijor ke bi pobitro banabole mon thakishe.

Apuni  biisor ke inika hi apuni laga baba, apuni laga sathi aru apuni laga morom hobole dibo? Apuni Isor ke pura mon di kene morom kure? Hebrews te likhe: Hebrews 11:6 biswas nathaki kene kun bi Isor ke khushi kuribole naparibo, kile koile jun Isor usorte ahibole mon ase, tai Biswas kuribole lage tai Isor ase koi kene; aru tai hi khali asish pabo jun Isor ke bissaribo.

Oh Isor laga bacha khan, Isor ke bhal pora jani lua hi jibon ase aru taike itu pora hi khushe kure. Isor kinika ase taike jani kene taike khushi kuri kene thakibi. Jitya apuni bisaribo apuni hosa bi taike pabo .

Aji bhaban kuribole laga pobitro kotha tu hoile john 12:45 & john 14:9tai jun manu amike dikhishe tai taike dikhishe jun amike pothaishe.