Dec 26 – KITUNGAN TIYLANGTEN!

“Do amben labo lingan itente a jabmolan a bwdte, antapsele do jabmolan apsele Anin ganuran appaite. Do Anin labon saring jandruman amdungte do antate bangsa do atengdam dete. Kun a dinna lingan jontu-namji l’ang garupa jannong lingan jumjumtenji” (Jisaya 30:23).

Kitungan absittataben do Anin kuddub banangsa tiytaben. Bo ganalam-maran adhimle kan ordar a d’ong ‘Ordara a Ganalam-mar’.

Aninji gamteji boi boi ganalamdam do kuddub ganalam-maranji saring surdadam. Kun ganalam-mar gabdelle do sabjale bo rubmangdaman ajanab. A ganalaman do abanudin kuddub ordar-lingan pamengle. Anin Judha-mar Abraam saring ayiraitenan amandran.

16 saring 17 sensury mihnum adnang, Galileo, aboi surda ganalam-maran, gabdile surda janabanji gabdelle, unji agaijan do jupitor. Anin karukkudan saring Judha-mar. ateng surda ganalam-maranji, Thomas Alva Edison, Newton, Judhanji dakule. Ajardinna, 95% a ganalam-maranji ordar-lingan judhanjina dakule. Iten aberna ambrij bo surda anabsittan Judhanji amangling? Kan ate Kitungan Abraam a d’ong ahimle do absittaben abmele oskailen kuddub abirindanji (Aparamangtan 14:20& Ebri 7:2). Kun ambrij, Jakub gadrij’eneten Kitungan batte itente Kitungan a d’ongan tiyte a tiyben abmele (Aparamangtan 28:22). Kan ate aboi radu gadrij’enan, kun asan Abraam saring ayiraihenji amandranji anabsittan dele.

Anab-bagu ordaran a sanu adnang, American do Soviet Union desan gamle sanulenji mailen do Germany a d’ong abarileji. Agante aninji Germany a d’ong abrileji, aninji gijgijleji ganalam-maranjin a d’ong. Kuddubanji judha-mar deleji. Do kun ate abanudinji do aganalemanji asan dele, kun ayam Russia ganalaman asaiben oskailenji. Kan aganalam-marji aboi tagoran saileji ayirben asan angaitaban. Nami janang, itejanab ganabdelan delenden amben ahimte, itedeleja a machines, phone, tanaran abmele kun kudduban Judha maranji gabdelleji.

Amben janang Kitungan a d’ong atiyben dete, ayengan a O’nan Jisun Kristun tiyaiten, amben absele. Do Kitunglen Jisun Kristun, amihaman lalen atanakkudan ayamling janang abluben abmele. Kalobori arakadangling tiydamneten, pintuben surda tanamadan tiyle do man’oihan batte atandeben asan. Tanahimdam Kitungan a onagji, amben adtiyepo man’oih uggaran batte?

Okiy Kinolbe absele: “Bittidam-ling-nam Gamangtungan a d’ong abpemenga, do tanartum-nam a pardi j’o tanuban batte Anin a d’ong abgugua. Seletten gulumising-nam awr bittin batte barij dete, bar drakiya darakuda lingan saring rong drakiyadan larre l’ate.” (Bangsa Hanang 3:9,10).