Dec 25 – CHRISTMAS A R’U BERAN!

“Bar Kitung-gangkilan a r’uberan boiboi gugudam, gamle kuddubanji abpengbateji. Kitungan, d’ong lingan panunggen dele, Janggarda lingan, roitad, gamle panemengan dele, ruang pisirdianji batte gittale, bzgarda jatti maranji amang lingan anoblengan dele, ordar lingan mandranji batte Anin derderan dele, ganugu panemengban Anin anamdaijan dele” (1 Timoti 3:16).

Antantulla Appam a timhimten amandranji, hen boi boi limtaben Kitungan anabsittan a tanimhiman batte. Kan kisimisi a man’oihan-ling kuddub-ben. Anin anabsittan do a ganugu uggar-ling-ben do s’ing-ling-ben barijete, kan angante Kitungan a o’nanji Kristu Jisun a karukkudan ayimteji, kuddub ordarlingan.

Christmas a r’u beran iten? Do kan a sanurdan iten? ‘Kitungan d’ongdage ganijtan dele’, kun po ate Christmas a r’u beran. Kan sattangted a sanurdan apsele bindo man’oihlen asusuna apsele janang. Bibolan gamte: “Kitungan, d’ong lingan panunggen dele, Janggarda lingan, roitad, gamle panemengan dele, ruang pisirdianji batte gittale, bzgarda jatti maranji amang lingan anoblengan dele, ordar lingan mandranji batte Anin derderan dele, ganugu panemengban Anin anamdaijan dele” (1 Timoti 3:16).

Madling-len saring Kitungan adgijtae. Anin dakuten gijle adraptiben atanaa-lingan, butenja adgijetji orde buteja agijeji. Do Anin bo resa-sijge ordarba yiraiten, bute janang gijle do olanle raptiteji. Yan a bangansan kan ate Kitungan resa sijge absuidamlen do anlen ampara dakuneten! Ahiman-na Christmas ganaman dele.

Ahiman ‘Jisu’ gamlenden ‘Anin ablute amandranji a pintunji saring’. Do ‘Kristun’ gamlenden ayengan janabuban adelen ate. ahiman ‘Immanuel’ gamlenden ‘Kitungan anlen ampara daku’. Kan ahiman saring, tumadgijmar Jisaya man’oihan batte moloi murdadage ahiman tiyle. “Anin Rubmangdam, Taniyber Mar, Ranapti Kitungan, Tarda Ayam U’an, Sanabyun a Raja, gamle ahiman panemengan dete.” (Jisaya 9:6).

Ruang-lingan Kitunglen ordarban yiraiten rubmangdaman janibjib ahiman do derdernan. Bindo Anin janang anlen ampara dakuneten. Bangsa anoblingber Jon, anlen kinoltabe: “Bar bernan d’ongan gadelle, do asuyeman bar janardin batte barij dean dele, mangba-len dakunten. Bar U’an ampara a min tum Onan a ganugu panemengan ambrij, ettegoi Anin a ganugu panemengan anlen a gijlai. (Jon 1:14).

Okij bo r’u beran Jisun d’ongan gadelle. Do kuni na ate absuiben orde U’an Kitungan ruang-lingan absuijaiten. Kitunglen Jisun gamte: “butente d’ong-Hen gijte anin U’an a d’ong gijte” (Jon 14:9). Jisun Kristu a karukkudan batte ordarlingan, amben gijle araptite ayengan a Kitung ganijtan adead. Tanahimdam Kitungan a onagji, kan bo surda r’u beran batte amben m’oihnaba kan a denna-ling.

Okiy Kinolbe absele: “Do kun gugu asuyeman batte lanangkan saring mangba-len danungyungan dele. Yante gamle lungudan do karahidan a lugngu lingan a gobten a mandranji amang lingan Anin abpuangte. Do sanabyugod lingan abanjengtalen” (Luk 1:78,79).