Dec 22 – Isor pora hi rakhi thakibo!

Psalms 12:7 ami khan ke hodai bachai kene rakhibi, oh Jehovah aru amikhan ke inika manukhan pora alag kori kene rakhibi.

Ami khan bishi bar pobitro kotha te dikhi pai ki “isor jun hi bachai”. Apuni laga jibon kinika ase itu sob chari kene, Isor ase apuni ke bachabole karone.

Homoi ahe jitya apuni ekta thik faisla khan ke lobule lage apuni laga jibon te. Aru apuni khan jane ki itu faisla khan pora hi apuni laga aha laga jibon  ke bhal kuribo. Hoilebi apuni khan bishi digdar te thaki kene kuntu rasta chuni bo itu najani kene ase, ekta thik faisla kuribo napari kene ase. Apuni thik pora kobo napare kuntu rasta thik ase, dahina na baya te jabole lage, utu manu ke Biswas kuribo na nai. itu khan sob te judi apuni manu khan ke mon khushi kuribole icha ase titya apuni khan laga mon te shanti nathaka hoi.

Jitya apuni inika homoi te thake, apuni laga shanti ke dhuri kene thabi aru Isor ke sabi aru taike kobi, “Isor judi ami nijor pora hi faisla  lobule ase, ami laga sob jibon tu borbad hoi jabo. Inika homoi te, ami nijor laga jibontu, bhabna tu aru aha laga din tu apuni laga tagot hath te  di ase. Apuni hi ami karone faisla kori dibi. Aru apuni laga icha amike dikhai dibi!” jitya apuni inika prathana kure, Isor pora apuni laga jibon te ki biya lage itukhan sob ke hathai dibo, aru apuni karone notun  rasta banai dibo. Aru inika hi apuni ke sob biya pora bachai rakhibo.

Pura pobitro kotha laga Psalms 121 tu Isor laga kosom pora hi bhorta kuri kene ase. Bishi manu khan tu itu mon pora yaad kuri kene kobole paribo. Poribi itu psalms ke buji kene aru Isor laga naam  uncha kuribi apunilaga mon te Biswas thaki kene. Aru apuni tu Isor laga morom pora bhorta hoi kene thakibo. Psalms 121:3,5,7 tai apuni ke kityabi giribole nadibo; jun apuni ke modot kuribole ase tai hodai uthi kene ase. Jehovah apuni ke dhuri kene ase; tai apuni laga kinarte ase apuni ke bachai dibole nimite . sob bhoi khan pora Jehovah apuni ke bachai kene rakhibo; tai apuni ke zinda rakhibo.

Jitya apuni pura nijor ke didiye Isor laga hath te, apuni jani bo ki Isor tu tai ase jun hi apuni ke bachai, najaja laga bhabna khan pora. Ekbar apuni ituke jani she koile, apuni bi apostle paul nishina hi inika kobo, 2Timothy 1:12 ami jane amikun ke Biswas kuri ase aru mangishe, ki tai itu rakhibo pare juntu ami koishe utu homoi tok. Hoi apuni ke Isor hi bachabo. Ami khan laga Isor jun hi koishe Joshua ke Joshua 1:5 joshua, jiman din tok apuni jinda thakibo kunbi apunike harabole naparibo. Ami kinika moses logote asile thik inika ami apuni logote thakibo. Ami hodai apuni logote thakibo; ami apunike chari kene kitya bi najabo.

Genesis 28:15 monte rakhibi apuni jun jagate jailebi ami apuni logote thakibo aru ami apunike bachai kene rakhibo, aru ami apunike itu deshte wapas anibo. Ami kosom khai kene apuni ke kiki koishe itu khan sob nokora tok ami apunike nacharibo. Itu Isor hi apunike bi kosom di ase aji ki tai apunike bi bachai kene rakhibo. Isor jun hi kosom diye tai tu dankorta ase aru tagot ase itu khan ke pura kuribole. Itu karone naam uncha kuribi aru Isor ke dhonyabaad dibi apuni laga mon di kene.

Aji bhabna kuribole laga pobitro kotha tu hoile Psalms 46: 1isor hi amkhan laga jaga ase aru amikhan laga tagot, hodai digdar homoite te modot kuribole rukhi ase.