Dec 17 – GAMANGTUNGAN SANUTE!

“Gamangtungan amben apsele sanute. Amben maih rznglen dakunaba” (Hanagod 14:14).

Kan abmele dile mandranji akznolben itsumteji. Bindo kan a bernaling, aganludben do alumben abmele bo surda kalkaldam. Kitungan a’onanji, asanabyunji adyamaji. Aninji barijloge alumben itsumteji sanaisai ayamling, do ateng ayam aninji abmele kalkaldam deteji do Kitungan aninji abmele sanuten.

Kun ayam Mojes dakule, anin kun ayam. Anin ogandile Israelanji boanta baran misordesan saring abluben abmele, aranaptin batte. Anindaman kan ambrij alumben itsumle. Bibolan gamte: “Bar Misor desa baiji a baiji hanangan abmele Mojes ganalaman hangeten, bar berna lingan do a lanum linganji anin gugu ranapti maran dele” (Anappai 7:22).

Boatan baran saring Israelanji a d’ong amdungben abmele, Anin misor maranan a d’ong kadhidle. Do kun batte Paron aganijgij-ling saring tanuabmar dele. Kan asan, Misor saring dunglen yireten do Israelanji, do Midianites a desa ling eaten sone.

Angante kun Midian desalingan dakule, Mojes amangba Kitungan absuidamneten. Anin absuidamneten aboi ahamangten aneban ambrij- kun neban hamangte bindo adjuntude. U u, bute janang ogandilenden kan ate, bindo Kitungan ate, abaran amandrengna banangsa lingan hamanten ate bindo kun ayamling, adjuntude. Amben aganludben dete jaruloge janggardadage ajardardin do abaran mandrengna lingan.

Bogad amben tanongbaben anablu abmele agarberden, amben tanongbaben asurpidben dete ranapti a s’i-lingan, garberan Kitungan a d’ong single do abgugule dakunabendete. Amben dernaben dakuben dete do tanongbaben Kitungan ablute gamle. Do Kitungan a ‘ongan ablute. Bindo jajingante ate aninjidaman abdindingtenji do a tanongbanji anablu dingte, itente a j’en batte adeten ate.

Angante duaimaran manglingben yirtai, orde koraling d’ongben kani kuni gamte, Kitungan ajingban surpidba. Iten asan gamlenden Anin na sagalte amandran. Danukaben surpidba do amang-lingan derdernaba. Amben adernaben dete do Kitungan amben abmele sanuten. Do Anin daina tiybenten.

Okiy Kinolbe absele: “Gamangtungan hen apsele a sibdailen a kuddub bernanji abojoraite. E Gamangtung, asuyem-Nam er ahiddam; Aman s’idam-Nam batte a lumlen a baran umdrengdong” (Sanenken 138:8).