Dec 11 – Tagot Isor laga!

Hebrews 11:34 dangor jui khan ke harai dishe, aru dao pora mora pora bachishe. Tai khan komjur asile hoilebi pichete bishi tagot hoishe; taikhan lorai te bisi tagot thakishe aru dusra desh laga sipoi khan ke harai dishe.

Itu verse te thaka tagot tu hoile swarg laga tagot ke koi ase, jitu tu ekta manu laga mon pora ulai Biswas thaka karone. Itu swarg laga tagot pora hi apuni khan ke komjhuri te bi tagot dibo. Aru itu pora hi apuni khan ke lorai kuribole tagot dibo.

Bishi manu jun khan gau pora tagot ase tai khan tum on pora tagot nai. tai khan bhoi kure andhera te aru aru biya atma khan laga agete. Aru chutu mutu dukh te bi bishi chinta hoi jai. Aru tai khan nijor laga jibon tub hoi khai kene thake. Itu tu kilekoile tai khan isor laga tagot ke bhabna nakure tai khan laga jibon te.

Hoilebi kinka Isor pora ekta manu ke tagot diye? Sobse poila tai manu khan ke Biswas diye aru tagot banai tai khan laga komjuri te bi. Manu khan tai pora alag hoilebi, Isor nijor hi taikhan ke mate jun khan komjur ase. Pobitro kotha te koi ki Isor pora komjur khan ke chune tagot thaka khan ke sorom khilai dibole. Apuni khan bi judi aji komjur ase , Isor laga mahima te ahibi aru tai pora hi apuni khan te tagot dibo, aru cholabo dangor pora tai laga kam te.

Apostle paul tu komjur thakishe. tai tu sabole tagot thaka asile hoilebi mon pora komjur thakishe (2 Corinthians 10;10) hoilebi Isor pora tai laga tagot popra hi uthaishe aru ekta gawahi hobole dishe. Itu karone paul pora koishe 2 Corinthians 12:10 Krista nimite ami sob komjur, sorom, dukh, digdar aru gali khan lobule paribo. Kilekoile jitya ami komjur hoi titya hi ami taogt pai jai.

Paul aru bi koi Phillipians 4:13 ami sob koribole pare Krista pora jun amike tagot diye. Jitya apuni pura Biswas Isor ke diye, apuni dikhi pabo apuni laga bhitor atma laga tagot. Pobitro kotha te koi Psalms 29:11 Isor pora tai laga manu khan ke tagot dibo.

Isor pora apui khan ke aru bi tagot dibo koishe  hoilebi it utu hoile pobitroatma laga tagot. Ami khan laga Isor Jisu Krista koishe Acts 1:8 hoilebi apuni Shakti pabo jitya pobitro atma apuni uporte ahibo.

Itu karone Isor laga tagot ke Biswas kuri kene thakibi-Luke 24:49. Hoilebi junkhan Isor ke ruche tai khan arubi tagot ke pabo, tai khan siloni khan nisina hi uporte te thakibo, tai khan polabo hoilebi bhagor nalagibo, tai khan berabo hoilebi behosh nahobo. (Isaiah 40:31) oh Isor laga bacha khan apuni khan bi bbhorta hobi Isor laga pobitro atma aru tailaga tagot pora.

Aji bhaban kuribole laga pobitro kotha tu hoile Psalms 18:32 itu Isor hi ase jun ami ke tagot diye, aru ami laga rasta thik kure.