Dec 09 – KITUNGAN A RANAPTIN!

“Do aninji a d’ong absamangben asan Gamangtungan ambase ranaptin tetten dakule” (Luk 5:17).

Gamangtungan jzbjblen sanaman ranaptin mangbalen daku. Kuddub sanamangan, d’ongan, jznjzn murdadam. Bogad pwrardaben maranglenden, etigoi ajardina bangsa d’ongan, do Kuddub lingan manaran dakute.

Raja Daudo gamle, “E Gamangtung, d’ong-hen asuyemih, pwrarda-hen absamanga; iten asan gamlenden asanggem-ling-Nam hen pintun lumlai” (Sanenken 41:4). U u, amben do Kitungan batte a dakutenan ate bartabmete, pitunben saring adyerj’etenan adnang. Do man’oihan pwrardan ling-ben dakute do Kitungdage asanamang ahangte.

Kitungan gamle: “Hen aninji a er dernan rugaman ambrij absamangtai, hen anurdage aninji a d’ong timyimtai, iten asan gamlenden banandrab-Hen aninji amang saring daiyaraiten” (Osea 14:4). Tetne a gijtaben aberna aninji a er dernan rugaman ambrij absamangtai. Angante bo mandran erderna lingan dakute, aganij gijan, a d’ong do ganugu mandrengnan abs’ite, adyerj’eling Kitungan amangba yarnaiba, er dernaben saring Kitungan absamanbenten.

Ayengan amandranji Kitungan batte sanamangan hangteji? Aldung uggaran Anin absamangte (Luk 4:18). Tanunjingan do kanalkalan, ganalu do aldung uggaran. Aninji uggarlen do janggardalen abaldungteji. Angante amben aldungtaben bigarda danerderanji saring, uggarben asudate. Kun ayamlingan, Kitungan sattang hamle absamanbenten. Anin aldung uggaran absamante, banangsa appaile do absuyumle do sanayun tiyte.

Kitungan a janzbjzb beranji daku d’ongan do sanamang apsele. Anin pwrardan ling-ben d’ongan pangtai. Anin erdernaben saring absamante. Anin aldung uggaran absamangte do asuyumte. Anin janang absamangte awrloge, do ranukulingan adakunji amandranji. Yan banangsa mangbalen Kitungan daku! Kitungan gamte: “Gija, Hen kan a gardan apsele sarukkan do sanamangan pangtai. Hen mandranji a d’ong absamangtai, bar Hen aninji amangban karran awr sanabyun do janardin abpunggetai” (Jirimiya 33:6).

Kitungan a baraling adakutenan adnang kan ordarlingan, buteja agasa sanamangan erhanglaben ayireten amandran amangan saring. Tanahimdam Kitungan a onagji, Kitunglen agaja abandane ruban, nami, do tordong ayam, Aninna ablubenten do Kitungdage asanamang tiybenten, nami.

Okiy Kinolbe absele: “Anta saring Jisun sanenpwr sobasing lingan hanangberan tiyata tiyata, do rajaman a bangsa anoblengan ablengtan, bar mandranji erandij rugaman do banzmbzman absamangata absamangata barij Galili lingan endungeten” (Mattiu 4:23).