Dec 05 – Isor laga bachav!

Psalms 91:6 nahoilebi andharte kiba biya bimar khan nalagibo nahoile dinte ekubi biya khan apuni ke morabole naparibo.

Sob verse Psalms 91 laga Isor laga bachava apuni khan laga jibon te thakibole laga zaroorat tu dikhai. Itu verse khan pora hi dikhai kinika tai apuni khan ke tai laga morom pora bachai kene rakhe sob dukh laga homoi te. Itu karone prathana kuribi Isor ke ki apuni tai laga sobse morom thaka laga bacha hobole nimite.

Verse 5 aru 6 te Psalms 91 laga psalms likha david pora din aru rati laga kotha ke koi. Tai koi rati laga dukh aru bhoi laga kotha ke, aru din te uri kene manu mara thir laga.

Itu tu Isor hi ase jun hi din aru rati ke banai she. “Isor matishe ujala ke din, aru andhera ke matishe rati. Toh utu sam aru phujir thakishe poila din (genesis 1:5) aru tai Isor ase din aru rati laga. Tai banaishe din apuni khan karone kam kuribole aru nijor laga jibon jinda thakibole. Aru rati tai banaishe apuni khan ke ahram kuribole aru nijor ke taza momn rakhibole. Tai bachai kene rakhe apuni ke din te, ura thir pora. Aru rati te, tai dukh aru janwar khan pora bachai kene rakhe. Dinte, tai apuni ke suraj laga ujala diye aru tai chand aru tara bi banaishe, apuni khan ke rati te bi kom ujala dishe. Hoilebi ekta kotha ase amikhan laga Isor laga bacha khan janibole lage ki Isor pora diya din aru rati te bi apuni khan Isor laga pobitro kotha ke dhuri kene thakibo lage, itu ke porhi bo lage. Psalms 1:2  hoilebi tai Jehovah laga niom khan te khusi pai; aru tai laga niom khan ke tai pura din aru pura rati bhabna kuri thake.

Jacob jun hi  tai laga jibon te upor uthibo mon, tai din rati bi kam kuri thakishe narukhi kene. Tai nijor laga maiki khan karone kam kuri thakishe, tai laga jati khan karone aru tai laga janwar khan ke bachabo nimite. Genesis 31:40 bisi baa rami din laga goromte aru rati laga thanda te dukh paise.ami ghumabole paranai. Hoilebi Isor pora Jacob ke bhal gau dishe bimar nathaka laga aru tai ke nijor laga baba laga ghor ghurabole modot kurishe. Itu Isor pora hi apuni ke bi bachai kene rakhibo aru modot kuribo.

Jitya Joshua judho jagate thakishe, suraj tu dubi thakishe aru sob jaga tu andhera hoi thakishe. hoilebi Joshua, jun hi Isor logote khara thakishe, tagot thaki kene suraj aru chand ke rukhi thakibi koi kene koishe. joshua 10:12 Suraj, gibeon laga uporte rukhijabi; chand ajalon pahar laga uporte rukhi jabi. Joshua 10:13  te dikhi pai ki suraj aru chand tu rukhi she, tai khan dushman khan logote badla naloa tok. Aru Isor pora  tai laga manu khan ke jitibole dishe.hoi Isor jun hi din aru rati banaishe, tai hi sob laga malik ae. Itu karone Isor laga bacha khan, apunikhan bhoi khabole nalage, Isor pora hi apuni kebachai kene rakhi bo.

Aji bhabna kuribole laga pobitro kotha tu hoile proverbs 3:24 monte olop bi bhoi nathaki kene apuni bisna te jabo, aru pura rati apni ahram pora ghumabo.