Dec 06 – DEVER JHAAD

Geeder Grandh 104:16 Yehovar jhaadan, Vu gaadojako Lebanoner devadharer jhaad sey, paanithi bharan cha.

Paanithi bhararich katho vu Dever ashish Dever beptaper avajen dekalacha. Hano panithi bharavajethi yek jhaader jada  vundho jaan meetchajako phal lagan harobharo panen lagacha.

Yisraelema Oliver jhaad yek dee varsethanu harobharo lagan vaddukaracha. Assa jhader kaandamen dekatho vu masaj penar dader chakaiko kan dikavacha. Pan vo jhaader paalo reda ann phal reda acho thaja racha. Jeevaj kunvatho Dever vaatheperan Vor devalema bhandaan revachko vo seji Dever harobharo ashishen pavacha.

Yezekel 47:12 vachanema dekatho bhakthidar Ezekiel kerocha kunas jhaad vatho Pavithar Athmar panir verikan gaadan rachko von malam karacha, Nandir karader doyi paakthima khayen kaamdera jhaad vaddan avukaracha. Vunder paan sukhayeni, vor phal kanai jhadeni. Yee nandir paani Pavithar jaagemathi  paran arichjethi meena meenan phal lagacha, vo phal khayervasu, Vor paan aushadhamer nai kaam dacha. Yek jhaader motpan von lagajako phaler vadithi malamvacha. Yesu bapu kacha her yek jhaad vor vor phalethi malamvacha;jethi thu Prabhur vasu ach phalen lagnu.

Galathivalun 5:22, 23 vachanema dekatho Pan Athmar phal kaikatho – prema, khushi, samadhan, dheerethi khamler, daya,achgon, viswas, shanthi, banahaayi yeej; assena dhvesh karer niyamkayi cheni. Colossivalun 1:10 vachanema dekatho, Solitharar aach kaamer phalena dena, Devena malamkarer genema vaddan, prabhur khathrer nai vona chajaju chalanu.

Kan apostle Paul kerocha, Ajji Hebrivalun 13:15 vachan kacha, jethi, apan vor yijjathena khamlena,sharer baar vordaayi nikalan jaama. Hanoj apan jammiper ann asmanema sada Yesu bapu saru phalen devaler nai renu, jana Dev thona ashish karacha. Vachan kacha Darshaner Grandh 22:2  sharer aaleer vachan, nandir doyee karadeparan, baara tharar phal dajako jeever phaler jhaad ra; vu heryek meenayi vor phalena dacha; vu jhaader paan jannena vaarukaracha.

Mar premer Dever beptavo thu samanyavagi gadamelejako rodder pakthimar jhader nai koni. Pan jeevaner nandir karadeper gadamelejako jhader nai cho. Tham sey vagthema aach phal devaler nai renurenu, ann thar jhaad kanai sukhayeniju renu. Hano renu katho thu Deven stuthi karan mahima kar Dev manna kathra aachethi yee jammiper rakadmelochi ka.