Dec 05 – KITUNGAN ARANABRABAN!

“orde lungud lingan a harten a rulinganji, orde tamba lingan a san’zdan, aman abbantonge.” (Sanenken 91:6).

Sanenken 91 lingan gadlamlangten mandrengna lingan murdadage Kitungan aranabrab beran. Tedne agijtaben abernan asuyeman batte d’onglen dongdrable a reneng ajaita dakulangten. Anten asan, Kitungan amangba garbernaba etteden anin d’ongben adongrabben apsele.

Sanenken 91:5 do 6, gadlamlangten togalan do denna abmele. Anin duaimaranji abmele gadlamaiten do lungud lingan a harten a rulinganji, dile dennan ayirtaih abmele do tamba lingan a san’zdan.

Kan ate Kitunganna agabdille adenna do atogalan. “Bar Kitungan panaledan, Dinnan gamle tiyhimeten. Do lanungudan, Togalan, gamle tiyhimeten. Anten asan oruban do tagaldan dean dele a pardi dinnan dele” (Aparamangtan 1:5). Do Anin na Kitungan dinna-lingan do togal-lingan. a m’engnaben asan Anin dinnan gabdile. Do alulunaben do adimadnaben asan togalan gabdileten. Anin anabs’idan saring rab-benten tambalingan, do aengten ahanga saring. Do togal lingan, Anin rulingan do tanuab-maranji saring rab-benten. Dinna-lingan, Anin anabt’aran uyungan saring appaitai, do togalan ayamling Anin angaitan do tuituijanji saring anabt’aran appaitai. Bindo kan ambrij Kitungan amandranji er lululing-ben a dakunaben dete – gamlenden Kitungan a berna-ling atiyj’enaben dete. “bindo osantan Gamangtungan anosai a mananne lingan anin m’oihte, do kanate tamba-togal anin ogalj’ete, anin man’oihdam” (Sanenken 1:2).

Jakub, ayengan amndrengnan abdainaben itsumle, tamba-togal baraling dakuneten. Anin addukkari abmele baraling dakuneten, anindaman amndranji abmele adongrab-ben asan. Angante Anin ogandile bardisamben asan anin gamle: “Tamban dagan, togalan rangan d’ong-hen gatarre. Mad-hen saring danimad-hen yereten, ednegoi hen dakulenai” (Aparamangtan 31:40). Bindo Gamang Kitungan Jakub a d’ong bangsa d’ong do samang dakule, do a U’an a s’ingban ayernaben sayamle. Kun ambrij Kitungan d’ongben janang rabrable sayambenten.

Angante Josua abararalingan dakule, ganyunle do lanumudan susule. Bindo Josua, Kitungan batte atanang dakuneten, anin bayeten uyungan do angaijan atanangben asan. “uyungan, etigoi tanangle dakule; do angajan janang atanang dakule.”. anten asan uyungan do angajan kandablingji, mandranji asanggem maranji a d’ong andrang dulpanadradan tiyenji sikkoi ja.” (Josua 10:13). Kun ayam Kitungan a mandranji a d’ong dainan tiyle.

U u, ajardinna Kitungle dinnan do togalan a Gamangtungan. Anin na uyungan do angajan gabdilen a Kitung. Anten asan, Kitungan a o’anji asan, abantongben sanaisaited orde anabkalkalanji orde tanuabmaranji.

Okiy Kinolbe absele: “Aman a ombungtenan adnang aman abbantonge; u u, aman dimadten adnang erabmuij dimaddatam.” (Bangsa Hanang 3:24).