Dec 04 – KITUNGAN AJANARDIN!

“Anin ajardin uddarda-nam do sanu handram-nam.” (Sanenken 91:4).

Bo surda Kitungan anabsitta Ajanardin na. Angante janardin abmele galamtabe, bagu bernan gadlamte: Janardin beran do Kristun a Janardin.  M’odan a jurdin ambrij, kan bagu a janardin, abpunggete mandran amangba.

Anlen bibolan a d’ong Marid kamb’ol gamtabe, kuddub bernanji bibol-lingan marid do janardina. Mandrengnan apsele. Ranan saring ateng sanaisai, awr sanaisai ranan saring; adangan saring ateng ragaldam do adangs’ingan saring.

Kuddub Kitungan a janzbjzbanji tordong ayam apsele dakute. Ruangan do ordaran s’ite, bindo a bernan agaja abs’ide. Bibol-lingan, gadlamlangte atanakudan sikkoija amben ampara dakutenai. Etegoi kan ambrij bernan daku do atalj’ingan a lippan do tagoran a tanaharanji appaitai. Buten buten bibolan atanahar-ling hatenji, aninji agaja adgalueji orde aninji agaja adayergudneji. Iten asan gamlenden Kitungan a bernan asan, janardinba urungbenten do sarrin abmebenten.

Angante Kitungle Jisun garberle a hangnamaranji apsele, Anin Kitungan ajanardin batte a d’onganji abmarid asan gadlamle. “Janardin-Nam batte aninji a d’ong abmaridaji. Berna-Nam janardin na daku” (Jon 17:17). Kitungan a bernan maridam do madirdam do abmaridtabenji. Manarid-lingan marantaben do amben Kitungan abernaling adaludten. Kitungan abernan janang kuddub tanolbadanji anuran dete. Jisun gameten: “Bar amben janardin a galamte, do janardin aburnataben” (Jon 8:32).

Kan abmele agalamben yan anabsittan, Kitungan aberna janang dongrable do rabenten. A janardin batte kuddub danukkanji do anabkalkalanji saring dongrablangten. Jisu Kristun dongrabmarlen. Anten asan, amben abantongbented orde asarmoibented, bindo Kitungan a d’ong aumdrengdong.

Mandran abmele aboi sanu samanan sanaisai. Kun ambrij, Kitungan aberna janardin batte dongrablangten kuddub anabkalkalanji saring, angante amben asanuten er marid janggardan batte. Kitunglen Jisun tanunjingan saring dainan hangle, Janardin aberna ahamdramle batte. Do Kitungan Jisun dainan hangle, amben janang dainan ahangte do kuddub saring sayambenten janggarda-lingan amarangben abmele.

Okiy Kinolbe absele: “Kitungan a dile bernan mariddam na. ayengan a mandranji anin amang lingan badturtenji aninji apsele Anin bo uddardage” (Bangsa Hanang 30:5).