Dec 02 – DEVER GEN

Vimochaner Grandh 31:3Ma vona Dever Athmathin, genethin, Samjervadithi, akkalethin, ann sey tharar kaam-dharipanethi abhishek Karmelochu.

Apaner Dev keri mundo dekeniju yeken yek thara ajeken ajjek thara dekanaju seni yekkaj thara dekevalo cha. Bibilema Dev ken vatho pavithar jeevano banchejen ashish karmelochko vunden thu herdelalen thar beptar vadi ann katmalevadi puro vaju araj karnu.

Kanker katho thu keldojathra thar beptavo padajema genethi chenikaiko. Vo kaivatho padarechko vona herdemelleniju gen kamchajethi bhooljarech kaiko. Lapan thu thar assa bepta vasu  cheni kanaju seni dharalvagi genen devalo Deven araj karatho vu Dev soli genen dethanu ashish karacha.

Apan Padejako vachanema yek javan choran dekacha vorvadi kenukatjo Vur kajakoner beta  vor naam Besalel (Vimochaner Grandh 31:2) Dev vona Taallen vona Dever Athmathin, genethin, Samjervadithi, akkalethin, ann sey tharar kaam-dharipanethi abhishek Karmelochu kan ko. Jethij vu chora sethi moto shilpkaarer nai bhar aayo.

Vu karojako kaam sonen aach roop layero ann rupo, ann pithaler cheejevun sada banayero ku kajako kaamema moto kalakarer nai vetho. Vona Dev dinojako genen Dever Derama sonethi banan rajako dhuvadir kacholi, maayin bhar sonethi buran rajako kararer petti, ann karunar peetan thayar karesaruj voibee Dev kojummaj vupayog kido.

Yernai Dev Von mangajakonen soli aach cheejen devasu ghasan dekrojako Dever pagema padan thon chavnu jako genen vu thar padayima red lokolakdi, samajer vadi , ajji kemai reda puch Dev thona dacha. Kuvatho Dev Danielen sethi dass haso genen dinoko hannoj thar beptana sada dass haso genen dethanu ashish karacha..

Thu parichor mundag hubarajanan, thu jayer hathayeni jathra door javanu kathoi kannai chamak math ann thamjomath. Kasen katho apaner Prabhu sath rethanu soli genethi bharan, seji kaamema sammorethi karen sahayam karacha. Apan malamkarlenu jako kaikatho Devethi avajako gen vu yee loker vadithi ayero koni pan vu Devethi Avacha.