Dec 01 – KITUNGAN A BANANGSAN!

“Ugai! Aman a d’ong a bantongten a mandranji apsele itente a banangsan Aman  tartumle, antate yan a surdadam! Bute bute mang-ling-Nam badturtenji, aninji a d’ong mandranji a temang lingan Aman awr banangsa-Nam tiyte” (Sanenken 31:19).

Ayengan a ordar lingan anlen kuddublen dakuteben duaihan do er banangsan daku. a yaman dakule, angante ayengan a mandranji hangdrangan hangleji mangben saring, aninji a sangemtabenji. Bindo kan kudduban umdrengba, Kitungle itente bangsa anten ate na tiylangten. Sanenken Daudo, ayengan Kitungan a bananangsa maimaile anin gamte: “U u, Gamangtungan d’ong-len banangsan tiyte, do desa-len gale-jabanji amdungle gadmangte” (Sanenken 85:12).

Bo denna pastor do anin a ompu- maranji ampara melgijleji sarebasingan agutulben asan. Do aninji hadab labon adhangadji jajingante ayam saring. Jajingante angai atiki, bo mandran labo atimben itsumle amangbanji, bindo ajanatin awrdam dakule. Bindo ranukun aderdernanji ambrij okij ejaja alabo adhangadji, aninji kunina ate ahiba gamle oskaidamlenji. Bindo pastor, turdumle garberneten Kitungan atimangba, tangsoi garberlen, Kitungan a itsum asaiben. Do Kitungan oblingle a d’ongan do gamle: ‘Itjaja akudidongne. Hen tiytaben itente bangsa’. Angante pastor hanangan tiyle kuddub mandranji a d’ong gadlamle aninji barabdaleji do dukkadaleji.

Jajingante angai atiki. Bo denna, bo gamang-mar gudingle pastor a d’ong kun amanengba do gamle aninji bo bigardan desan yirteji. Do aninji a bittinji abmele aogandilenji asan, aninji kun labon sarebasingan apsele a tiyben itsumleji. Do anin tiyle bo surda labon a d’onganji, itjaja lebun erjanglingbe kun sarebasingan abmele. Kun batte ranukkun amandranji do a surda maranji ogandileji yan asurda do abanangsa Kitungan a bara. Aninji Kitungan a d’ong abguguleji do senleji.

Angante ordardage a u’an gamlamte bangsa janaban a tiyben a passijanji a d’ong, ruangan a U’an adtiybenpo, ayengan amandra ateng timhimte, anin a d’ong bangsa taniytiyan adtiyepo? Anin engajanang tiybenten. Bo ayam, angante tabme mihnumba yirtebe, Kitungle jzbjzble opunglangten: “A jardin na banangsan do asuyeman mandrengmadta-hen sikkoi ja sandungtih bar tordong hen Gamangtungan a s’ing lingan dakutenai” (Sanenken 23:6).

Amben pedde ateng kanalkalan batte adakulen kan amihnumlen, do danuka tagorlingan a hanaling pedde. Bindo bogad Kitungan a d’ong atimihmlenden do adederlenlanden, kuddub kanalkalben bandate. “Bar bute bute Kitungan a d’ong timyimteji, bute bute Anin a tam aparamangta ganabrin amdrij ganudingan deleji, Kitungan kuddub lingan aninji a banangsan abmete, antate anlen a galam” (Romi 8:28). Kitungle ayengan a d’an arengan saring amdungle, Anin a rznrzngan saring abdinale abhanalangten.

Okiy Kinolbe absele: “Aninji Sion a langka darakuna lingan yerre, uai-sarrangan batte GAMANGtungan a d’ong senkendrateji, bar GAMANGtungan banangsan asan aninji a  mukkanji tan’arge deteji. Iten asan gamlenden GAMANGtungan aninji a d’ong jandruman, drakiya g’urdan, miholan do maranda-medan do maranda-tangan a onan tiyte. Bar d’an batte ranudan a delen a kuttan ambrij aninji a pwrardan erdu dete, bar Israelanji barokij angaja danukkan adde-eji.” (Jirimya 31:12).