Nov 28 – YAGI TAMBUSINGAN!

“Pitor Jisun a d’ong jalangle opungeten, E Gamang, tedne a dakunaben anlen apsele bangsa daku. Bogad Aman itsumlenden Aman apsele aboi, Mojes apsele aboi, do Eliyan apsele aboi, ednegoi yagi tambusingan anlen a sabjatai” (Mattiu 17:4).

Banandan mandrengna abmele, Pitor ateng m’oihle Kitungan atimanglen adakule asan. Kitungan batte panuangan do m’oihan batte barij-dele, anin gamle Jisun a d’ong, yan a bangsa kun amanengba. Yan a jardin tette!

Mandrengna-lingan ayirtaih a kanalkalan erogandilabe, yan a langa do am’oihan kan barun alanankka-lingan, Kitung-lingan dakule Kitungan atimanglen appuangnaben yan abangsa! Baru a lanankka-linganji Kitungdage aranapti tiylangten radudage Kitungan a bara alumben asan. Kan mandrengna-ling-ben ranapti tiyle do ranadu batte barij deandele Kitungan abmele atanangte.

Pitor umengdam dakule do itejanang umengle alumben itsumle. Anin Kitungan atanimihman batte barij dakule. Do aganten Mojes do Eliyan gittleji adnang anin man’oihan batte iten agamben dele kun ate adgalamad. Bibol-lingan kan aberna anzdolan dele (Mark 9:6).

Tanahimdam Kitungan a onagji, Mojes do Eliyan d’onglen sadle ayirben adakuad-badih, aninji anlen ampara dakulenanji yan abangsa badih. Kitungan badloyim-maranji batte arabangteji yan a m’oihan j’e-ling-len.

Pitor ogandile pedde, bogad Mojes do Eliyan Jisun batte maillingnanjiden, aninji ordaran a d’ong abyuryurteji gamle. Do bogad aninji mailenanjiden, aninji Israel-maranji amdungteji badih rom-maranji saring, do bo surda rajaman ordar-lingan gabdiltaji badih.

Pitor berna-lingan do anabhanalingan sarigoi addakulejanang, anin gamle ‘Kitung aman itsumlenden…’. Kan batte galamtabe do Pitor agarberan do agamlen abernanji, abaman Kitungan a itsuman. Angante amben agarte do agadlamte Kitungan amangba, agarberben dete Kitungan aitsuman mandrengna-lingan adeben dete. Jakubo Idolle: “amben agamben dete, “Bogad Gamangtungan itsumlenden, do anlen am’eng a dakulaienden anlen kani orde kuni a baran a lumtai” (Jakuban 4:15).

Angante Kristu Jisun Gatsemani kutta lingan garberneten: “Tette saring asui sangai abmangle turdudwble garberre gameten, E U’a-Hen, bogad rapti delenden kan a pinsaman temang-Hen saring sangaijete. Dele janang den a tam itsum-Hen ted bindo a tam itsum-Nam ambrij de-ete” (Mttiu 26:39). Tanahimdam Kitungan a onagji, amben agarbertepo Kitungan a itsum adeben asan mandrengna-ling-ben?

Okiy Kinolbe absele: “E Gamangtung, sarebasing-ling-Nam buten rapti dakuten? Marid bwr-ling-Nam buten rapti basute” (Sanenken 15:1).