Nov 25 – YAGI GADRIJ’ENA!

“Iten asan gamlenden, Jisu Kristun do arakaddang lingan Anin a karahidan sadan sadle temang-ling-ben iteja bernan aggalamai, gamle hen gabrij’elenai” (1 Korintia 2:2).

Kan mandrengna-lingan gadrij’na, kan batte ranabraban delangten do sanayaman anabsitta do Kitungan asuyeman. Nami anlen agijba yagi gadrij’enan abmele.

Anab-boi, Daniel a gadrij’enan abmele. Daniel gadrij’e-ling a uggar-lingan a d’ongdaman anabs’iden abmele a janggardan do Babilon aganaga batte. Bibolan gamte: “Bindo Daniel raja-janumjumanji do drakiyadan batte anindaman er marid abmedamnaben asan a j’e lingan adnitsumad. Kan asan anin angale anindaman er marid adnabmene, anten asan anin murda dane antanab-bai bar Aspenas a d’ong asuyeman gareten.” (Daniel 1:8).

Kan a gadrij’enan asan, Kitungan a d’ongan a murda dane antanab-bai anordinhangle (Daniel 1:9). Bar galji dinnan a tiki di raja-janumjuman a jumten a danggardan a mukkan saring Daniel do anin a gardinji a mukkanji boiboi tamseng do jeljel gittaleji (Daniel 1:15). Kun sattan ted, Bar ganalaman do banuddin apsele ite janang anualberan rajan aninji a d’ong ualeten, kun a kuddub bernan anindaman a rajam lingan a maiya banno maranji do karammagij maranji saring aninji a ganalaman galji terdeng awr anin gijeten (Daniel 1:20).

Nami, Kitungan apsele ranoitad-lingan gadrij’enaba. Do agaja er marid janaban a pangdong, d’ongben ermarid abmeben asan joldan, duaihan do ganijmadan batte abs’itaben. Angante amben a gadrij’eten, Kitunglen sattan er maridaban saring adrabben, bindo absittale do abdainabenten.

Anb-bagu, Jakub apsele a gadrij’enan. Kitungan itente tijtih antate galji mihtub tijtai gamle gadrij’eneten. Anin gamle: “bar Aman itente a kuddub bittin tiytih, kun saring galji tanub a mittub hen jardin na d’ong-Nam tiytai” (Aparamangtan 28:22). Engale Anin jzbjzb-ling man’oihan batte Kitungan janang m’oihle. Kun asan Jakub, ayengan a mandran aman ijaja adakuad, bo bittimarge yarneten, anteng boantanji do ateng jontungji batte. Kan a bernan gijtabe Aparamantan 32:10: “kan alon padlai bindo nami hen bagu patsardi delai”.

Anab-yagi, Daudo a gadrij’enan, Daudo gadrij’e-ling a j’e-lingan Kitungan a berna a timhimben apsele, do barijloge a surpid-damnaben asan. Anin lagad-damlen gamle: “E Gamangtung, Aman na tanub-hen; hen berna-Namji mannetai, gamle hen sibdaijlai” (Sanenken 119:57). Angante Gamangtungan gijle a omengnan, Anin abdainale do Israelanji abmele raja abm’eten.

Tanahimdam Kitungan a onagji, bogad amben a gadrij’e-lenden Kitungan aberna abmele, Anin absittabenten awrloge do abdainabenten. Amben abgaroydaben.

Okiy Kinolbe absele: “Hen banaihber-ling-Namji abm’oihdamtenai, do berna-Nam hen akkareda-ai” (Sanenken 119:16).