Nov 21 – Poila sapha kuribi bhitorte!

Matthew 23:26 andha Pharisee khan! Poila bhitor laga sapha kuribi, tini hoile bahar lafga nije pora hi sapha hoi jabo.

Jitya pauni nijor laga kam thik pora kuribo, Isor bi tai laga kam kuribo le tu khushi hoi jabo aru ashirbad dibo apuni ke aru apuni mehnat kura ke bi. Poila aru suru lag kotha te, apuni khan Isor laga swarg ke bisaribo lage aru tai laga hosake. Aru itu sath te apju I nijor laga atma ke bi sapha kuribo lage.

Apuni khan tu bishi dwarkhast kuri thaki bo pare apuni prathana kura laga homoi te. Hoilebi judi apuni laga bhitor mon tu sapha nai, kinika Isor apuni laga kotha hunibole khushi hobo? Judi itu kotha hi ase, tinihoile apuni tu nijor laga prathana te ekta khuta rakhi kene sa nishina ase. Pobitro kotha pora itu koi, Isaiah 59:2 apuni laga galti khan pora hi apuni Isor pora alag hoishe; aru apuni laga pap pora hi lukai dishe tai laga chehra apuni pora, itu nimite tai nahune.

Itu karone ghutna te prathana nakura agote, sob pap khan ke sapha kuribi aru sapha hobi.

Apuni laga bhitor atma tok dhulabo lage Jisu Krista laga khun pora. Khali utu prathana khan jun tu spaha mon pora uthe  itu ke hi Isor pora loi. Hoilebi kuntu prathana khan pap khan aru galti khan logote diye itu khan tu Isor karone tu moila ase.

Ekbar bhabna kuribo ki apuni ekta bottle loi kene duth lobule jai ase. Judi itu bottle tu moila pora hi bhorta ase, mati aru balu pora, kun manu bi tate duth nadhalibo. Jitya apuni ituke ghisi kene bhal pora sapha kuibo titya hi tate duth dhalibole para laga laik hobo. Itu nishina hi, apunilaga bhitorte bi, apuni laga mon atm itu khan tu sapha kuribo lage Isor laga pobitro atma ke nabisara agote.

Apunikhan bi ulai kene kun ke map mangibo lage itu  khan ke jai kene map mangibo lage. Ji saman apuni wapas kuribo lage itu apuni wapas kuri dibo lage. Apuni apuni khan sob pap khan ke swikar kuribo lage Isor laga agete kandi kene. Arua puni khan nijor laga dushman logote map di kene mon mili kene thaki bo lage. Ekbar apuni itu kurile, Isor pora tai laga khun pora hi sapha kuri kene apuni ke ekta sapha mon dibo. Aru tai apuini ke ki mangi ase itu tai laga pobitro atma pora dibo.

Aji  kali bishi manu gau pora kinika sapha thakibo lage it utu jane. Tai khan nijor laga chehfra dhulai, dat sapha kure, gau dhulai sabun lagai kene, aru ki ki lagai gau bhal thakibole karone. Hilebi tai khan laga mon tu hile pap pora hi moila, mon tita lagi kene aru biya bhabna khan thaki kene. Oh Isor laga bacha khan, itu bishi zaroori ase, ki apuni khan atma arum on pora hi sapha thakibo laga tu, apuni laga atma laga jibon karone. Apuni bahar pora gau sapha sundor thaka tu atma laga jibon te iku faida hobole nahoi.

1 John 1:9 judi amikhan pap ke swikar kure, tai tu dankorta ase aru apuni khan ke maph kuri dibo ami khan laga pap ke aru sapha kuri dibo ami khan ke sob biya khan pora.