Nov 21 – ABMANG A L’UNGAN GIJJA-A!

“…abmangan pinsaman do rabtalan a l’ungan gijja-a….” (Mattiu 23:26).

Angante amben baraben alumte bangsale, Gamangtungan m’oihte do absittabenten baraling-ben. Aparamangta-lingan, amben Kitungan a rajaman asaiben dete do Anin aranoitadan. Do kan ambrij, amben apwrardanji amadridben dete.

Amben ateng agarberten pede do turdumle agarbertenan ayam-ling. Bindo bogad a l’ung-uggarben abmaridlenden, yangan Kitungan m’oihe garberben amdangben asan? Bogad kun ambrij dakulenden, kan aboi amben agarberan asusute danukan batte, pintun atanolbadan. Bibolan gadlamlangten: “bindo danusa-benji Kitung-ben saring d’ong-ben ansabenten, bar pintu-benji asan mang-ben saring Anin a mukkan absosole, anten asan Anin adnamdange” (Jisaya 59:2). Anten asan, turdumle endran garberan asusue, pintu-ben omrengba do Madrid-damnaba.

Al’unguggar-ben agijdaben dete Jisu Kristun a mihaman batte. Sattang marid uggaran a garberan anamdangan dete, ateden Kitungan jabenten garbernabenji. Bindo kuddub pintun do ermarid lanumanji agarberan janajan adea Kitungan amang saring.

Jaba ogandile a gijba amben aboi tekali pangba aduban ahangben asan. Bogad kun tekali er marid dakulenden, joban do soldan, buteja aduban adrueji. Sattang amben amadridleden, amben aduban ahangte. Kun ambrij, amben al’ung uggarben, amben j’eben do pwrardaben amadridben dete agante Marid janggardan ajanabob asaite ayam.

Amben kuddub alumle anardodanji ahimle tanamadan abmele agarbernaben dete. Itedeleja amben adyer j’enaben dete, amben adyar-j’enabenna dete. Do amben kuddub pintu-ben apinbaben dete, edanan batte Kitungan amangba. Amben ayengan a danusanji alumle bigrdanji batte do aninji batte mailen. Bo tangor amben alumlenden, Kitungan madridbenten amihaman batte do al’ung uggarben madrite. Do Anin Marid Janggardan a ranaptin batte jataben.

Nami, ateng mandranji daku yangam a d’ongdamanji marid dakuben asan. A mukkanji gijdateji, tanjitenji, sabun batte ubmalen do powdoran jodtenji. Bindo a uggaranji pintun batte barij dakuteji, anasangan do anabdusanji. Tanahimdam Kitungan a onagji, kan ate murdadage abernan amben marid do mardir adeben dete al’ung uggarbenji, do janggardandage amandrengnan-linganji. Do kan saring iteja tangoran asan manlenglen.

Okiy Kinolbe absele: “Bogad anlen a pintun abpengbalenden, pintu-lenji a tabmadben asan, do kuddub er ranoitadan saring d’ong-len abmeteben asan Anin dernadage do roitaddage na” (1 Jon 1:9).