Nov 11 – AMAN MANDRANJI A D’ONG HAMTE!

“Bantongdong, nam saring aman mandranji a d’ong hamte” (Luk 5:10).

Janggarda-dage amandrengna Kristun abmele pwrardanji hangdrangan, Pitor amandrengna-ling omdile dakuneten, ayengan amandran hamyomar dakule. A mengben abmele ayon hamle dakuneten. Kitungan a rajaman abmele anin pwrardanji abrukkule. Angante anlen gijtabe ajaruberan, Kitungan baran tijlangten surda do hadab danebaranji. Bo surda hangdrangan mangben saring Kitungan saite anten asan anin surda baranji tijbenten.

Hamyobaran ordardage a bara, Kitungan a rajaman abmele pwrardanji ahangben janggardadage abara. Ordardage aganalam batte, amben ayon hamle arabtite. Bindo Kitungan aganalaman batte, mandran a d’ong hamle orde pwrardanji erahid rajaman abmele. Do kan ambrij lumle, Kitungan Pitor a d’ong bo surda janggardadage hamdramle do Marid Janggardan tijle handramle.

Kitungan galamle Pitor abantonge gamle. Kanina ate Kitungan ajanibjib do abanaih. Do Anin gamle: “Nami saring aman mandra hamte”, kan ambrij Pitor aman saring ahangdrangan dakule.

Iten asan Pitor a d’ong Kitungan gamle bantongdong? Pitor ambrij alumle a rumang baranji amandrengna lingan lumle, Pitor barijloge lumle. Anin ogandile anin Kitungan atimanglen tanangle adrabtie gamle. Anin Kitungan amangban gamle: “E Gamang, mang-hen saring yera, iten asan gamlenden hen bo pintu mar”. Angante Simon laggad-damlen gamle banantongan batte, Kitungan babyelem gamle: “Bantongdong, nam saring aman mandranji a d’ong hamte” (Luk 5:10).

Nami janang Kitungle d’onglen gijgijle gamte a bantongdong. Amben a ogandidamtinpo bangsa mandrengna adhanandamtihani gamle, Marid do mardir mandrengna Kitungan abmele? Amben a oganditepo iten asan ateng kanalkalan daku janggarda mandrengna lingan? Amben ogandile dakupo hen pintu mar gamle? Kitungle hamle do bandate d’ongben nami. Tabme mandrengna susute nami saring do Tabme ranapti batte daina do daina mandrengna. Do amben adete mandran a hamben Kitungan abmele.

Ayengan a Kitung Simon Pitor a d’ong bandale a mandrengna. Aboi hamyomar a d’ong ajar ajar pwrardanji urunglai Kitungan arajam abmele. Kani na ate bo surda baran amandrengna lingan lumle Kristun abmele. Tanahimdam Kitungan a onagji, saiba do Kitungan atimanglen dakunaba janggarda-lingan do Kitungan rumang bara lumte mangben saring.

Okiy Kinolbe absele: “Ranoitad-Nam surda barunji ambrij; banitsara-Namji ganingan a janarun ambrij. E Gamangtung, Aman mandranji do jontunji a d’ong rabrabte.” (Sanenken 36:6).