Nov 07 – Mon pora thik thaka!

Phillippians 4:11,12 ami itu kuanai ami kibi lagi ase, kile koile ami jinika hoiole bi pari jai. Ami jani ase nathakile kinika lage aru bisi thakile kinika lage. Itu ami jani jaise, itu nimite jun jagate hoile bi ami pari jai, eku nakhai kene bi pari jai aru iku nakhai kene bi.

Itu verse pora apostle paul kotha kure jana aru shikai diya upor te. Kisuman kotha khan ase juntu apuni nije hi jane. Aru kunuba tu manu pora shikai di kene jane. Bishi hosa kotha thakibo pare jitu paul pora shi kishe  tai laga nijor anubhab kuri kene janishe tai laga atma pora. Aru alag hosa kotha bi ase jun tu Isor pora shikai. Hoilebi ekta bhal kotha tu ki ase koile tu ji hoilebi thik thakibo lage.

Bishi tufan khan ahishe prabhu korta khan logote, aru tai khan tu Ghana jongol te berai thaka nishina bi thakishe. Aru kitya bat u biswasi khan tu bhabna kuri thakibo kinika iman dangor tufan ahishe tai khan laga jibon te.

Hoilebi Isor pora tai laga biswasi khan ke janibole diye ki jtya inika dangor hawa pani ahe, ghas tu hili jai aru itu karone hi tai laga jar tu niche tok jai pati te dhuri kene thkibole karone. Hoilebi aru komjur gash khan toh bhabngi jai.

Aru ekta ki bhal koile tu hawa mara karone gash laga guti khan tu dur dur tok bi jai aru alag alag jag ate tai laga bijon tu ulabole shuru hoi. Itu nishina hi biswasi khan bi jitya jbon te dangor hilai diya laga dukh ahe thik pora pobitro kotha ke dhuri thakibi jinika gash laga jar pora mati ke dhuri kene thake. Itu pora hi apuni ke hili bole nadibo apuni laga Biswas te aru apuni laga bijon bi bishi jag ate phelabole paribo.

Itu tu hosa ase ki paul tu ekta dangor chela thakishe, tai tu bishi manu khan ke tu rasta dikhabole pari thakishe. Taike satan laga manu ase koi kene kata pora bi mari thakishe hoilebi tai thik thakibole jani loishe.

David bi tai laga homoi te ekta dangor raja thakishe. Tai laga parivar te bi dush man thkishe. Tai ke bi tai laga nijor chokra khan pora bi khedai thakishe. Abraham bi dangor prabhubhakta thkishe hoilebi tai bi iman duk laga samna kuribole lagishe tai laga maiki nimite.

Oh Isor laga bacha khan, apuni laga jibon tu itya ki hoile bi, apuni ki ki lagi thakile bi, duk te nahoile shanti te thakile bi, shikibi thik thakibole Isor logote. Itu pora hi apuni ke dangor ashirbad ani dibo.

Aji bhabna kuribole laga pobitro kotha tu hoile proverbs 15:16 dhoni hoi kene digdar te thakia pora dukhia hoi kene Jehovah ke bhoi kori kene thaka hi bhal ase.