Nov 04 – ANIN A GANUGU PANEMENG D’ONGAN AMBRIJ!

“Anin kuddub janabanji a danedam lingan a dakkuben a ranaptin a lanumlumman batte, Anin a ganugu panemeng d’ongan ambrij erasamtung d’ong-lenji bandate” (Pilippi 3:21).

Itente d’onganle kan ordar-lingan daku er-hangdrangdage, do rugam bimbimlingan dakute, do janoldan, mananga do er-tu’uan. Kani d’ongan arasudan batte dile tordong dakute, kanalkalan do danukan do panadradan. Bindo Kitungle a ganugu panemeng d’ongan abmete.

Bananda d’ongan egale Krsitu Jisu batte yanarmengan a d’ongan ambrij. Er bangsa d’ongan banangsa dete do er marid d’ongan marid dete. anappai Pol idolle 1 Jon 3:2 “..bindo Anin panunggen a deten adnang Anin ambrij anlen detabe, gamle anlen a galam, iten asan gamlenden, engale Anin daku, ettele anlen Anin a d’ong gijtabe. (1 Jon 3:2).

Yan a ganugu do abangsa Kristu Jisu batte a yarmengten a d’ongan! Kun a d’ong batte, anigadan a s’ing-lingan ganeten a hanang-marji arukubalenanji, absittale sanabyun do dakule aninji ampara. Kun atanurdu-lingan a hanangna-maranji, Oliba baru sikoija, Jisun ruangban tayele kun ayarmenglen a d’ong batte do goble a Uan a jandrumsengba.

D’onglenji janang Kitungan batte banandan dele, a Janggardan batte. Anlen gagatenben yagitara bo dinna-lingan, d’onglen ranadun ahangben asan. Kun ambrij, Kitungan aberna amdangtaben along marlen banandan adeben asan. Kitunglen a berna adangda ambrij, adangan a s’ing-ling saring adungte ambrij.

Kun ambrij, Anin objongle Marid Janggardan a janabboban ate tarongyiman ambrij, ayon do adresiman. Alung-maran ranadun hangte Janggardadage aganaga batte. Kun asan, Anin a d’ongan do a mihaman anlen abmele tiyle kun asan d’onglen ganugu saring ganugu adeben asan, kun ambrij Anin yarmengle. Angante rutipun do drakyada ajumte agate, Kristu Jisun a d’ong d’ong-ling-len maiten, do er galamlen ambrij d’onglen banandan dea-dele a d’ong-lingan mai-ling dakuten.

Tanahimdam Kitungan a onagji, angante Jisu Kristun mang-ling-ben yirtai, Uan aganugu batte, ganugu pisirdinji batte, er-hangdran d’onglen bandale ganugu yanarmengan tiyte. Ordardage a d’ong-lingan ruangdage a d’ong tiyte, Anin batte kuddublen ruangban anurungan dete. Yan aganugu abran kan ambrij dete?

Okiy Kinolbe absele: “Bar butente amang lingan kan a daneran daku, anin, angale Anin mariddam na, ettele abmariddamten” (1 Jon 3:3).