Nov 03 – Mukut mahima laga!

Tai apuni laga math ate ekta sundor mukut hoi kene thakibo. Proverbs 4:9

Ekta mukut tu hoile maharaja laga math ate hi  dhale. Rajyo laga mukut tu hoile sona , hira aru moti aru inika hi kimti pathor khan pora banai thake. Aru inika mukut pora hi sob ke janai diye ki itu lagai thaka manu hi itu rajyo ke cholai. Aru itu mukut hi nishani ase raja laga ki tai hi dngor, aru tagot ase itu rajyo cholabo karone.

Itu prithibi hisab te hosa thakile bi, sob prithibi laga mukut khan laga iku bi kimat nathakia hoi jabo ekta homoi te. Judi apuni itu mukut ke ekta sonari ke dibo tai tu hoile olop homoi te hi itu mukut ke bhangai kene ekta sona laga tukra hi banai dibo paribo. Aru itu bi hosa ase ki ekta rajyo tu tai laga hi hoi jun lorai kuri kene jitibo tai hi rajyo laga raja hobo. Aru ekta dukh laga kotha ki ase koile tu itu khotom hoi ja laga rajyo karone kiman manu bi tai laga ibon tu harai loi.

Hoilebi pobitro kotha te koi nadikha laga mukut juntu hi mahima ase aru mukut khemai diya laga, aru manu ke morom thaka laga (Psalms 103:4 ). Aru bi Hebrews 2:7 te koi mukut achurit mahima laga aru sonman laga. Itu mukut khan tu hoile sobse bhal aru sobse dangor ase itu prithibi laga mukut khan pora juntu ekdin khotom hoi jabo. Apostle paul pora likhe 1 Cor 9:25  aru jun khan protijugyata te bhag loi inam karone sob jag ate thik thik kene par  kuribo lage. Itya tai khan tu itu khotom hobole laga mukut karone kure hoilebi ami khan tu kitya bi khotom nahua laga mukut karone kure.

Pormeshwar pora apuni khan ke mukut khemai laga aru morom laga diye, mahima aru sonman logote. Kiman bi ekta dangor kotha ase ki ami khan tu lora suwali khan ase jun hi rajakhan laga Raja ase. Kunuba khan tu taikhan laga pora likha ke hi nijor laga mukut banai loi. Aru kunuba tu tai khan laga kam jineka doctor, engineer aru advocate inika ke hi nijor laga mukut bhabna kure.

Hoilebi Isor laga bacha khan karone, hosa laga ekta mukut tu hoile pobitro atma pora chui kene chula hi ase.  Jitya raja david  tu jitya sob mukut khan prithibi laga pai thakishe, hoilebi pobitro atma chua laga hi asol mukut ase manishe. Itu kotha tai Psalms 92:10 te koishe. Amike tu taza tel pora hi chuni loishe.

Itu tu chuni loa karone hi ase ki ami khan bi dangor Shakti upor pora hi pai kene thaka ase. Pobitro atma tu hoile apuni khan lag mon bhitor te hi thake, ji pora apuni khan tagot aru mahima pora bhorta hoi thake. Aru kun bi itu mukuht ke toh chinibo naparibo. Aru itu nishina pobitro atma pora chuni loa hi ase amikhan laga jibon te ki ami khan mitha phal tu mnau ke dibole pare aru bhal atma ke dikhai dibole pare. Aru itu pobitro atma pora chuni loa hi apuni khan ke prithibi laga manu khan pora alag kuri diye.

Aji bhabna kuribole laga pobitro kotha tu hoile psalms 23:5 apuni amilaga dusman khan usorte amike khilai thakae, apuni tel pora ami laga mathate lagaishe, ami laga cup tu hoi bhorta thake.