Nov 01 – KANNAI BHULAYESINI

Yeshaya 44:21Yakob, Yisrael;hinen herdemella thu Maar seva karevalo Maaj thon thayar kidochu, Yisrael thu Maar sevakarevaler nai chi jethi Ma thona bhuler veni.

DEVAJ thothi hakkam derocha, “thu Maaroj chi. Thona Ma naam padan balamelochu. Thar yadir petema vetho janaj thon Maar saru taallidochu. Oh Yisrael thu Mathi bhulayesni”.

Yee jagema sey phaidovun lelen sada bhuljavaju banchrecha. Aajkal manikyavo thar dayithi phaido palacha, jer pacha thon bhuljayeroj koni lapan thothi  ladayinaj pharpadacha. Ann thonaj sarap denakacha. Ajji Thona ado mellen jeevanema vuncho vaddan amelejako voseji akharima thuj kai kaam deseni kan kenakacha.

Thothi phayido palinejako Ann thar dosthivo seji thona bhool jayekaiko lapan maro Dev thon kannai bhooleni. Vorsaruj Dev sogan karan kerocha, ( Yesaya 49:15, 16) Dhood pirarijako yadi vor balan bhooliye kai, Ann vor petema pedavojako betaper daya renikaiko? Sasij vo bhooljavathoi, Ma thona bhooluni. Dekha Maar hathema thona khanmelochu. Thar godavo hamesha Mar vachaj cha.

Yetha dee vaath bhari soch karnu lagach kai katho Dev apanen kai vasu bhooleni, kankren katho Vu Devaj  thona Vor dakal Ann Vor rupamema  srushti kidoch kajakoj agediyar bhoolnu konijako vaath. Apan seji Vo Dever sonth beptar nai renu jesaru,Vu apaner Dev Ann apan Vor bepta.

Moshey Yisrael jannen kerocha (Deemo Vupadesher Grandh 7:6) . Tham thamar Dever pavithar malavo ven cho. Vu Dever sonth janner nai rer vasu Vor saruj thamen taallidocha. Yee sari dharthiper thonaj Dev yek vishesh khajanar nai karmeloch.

Deemo Vu Devaj thona Vor anmoler Loyeethi mol lelinoch. Deven thar vumper chajako premathi asmanen chodan yee dharthiper Vonvuj kam karlen bayar nai ayocha. Vu bhari chajako siluvan Vor kandeper palden Yerushalemer gallivuma chalo. Vu apaner aparadhamevasu  Ann balla kamevasu ghav padaldo Ann marakhado . Athra jada prem karevalo thon kukan bhooliye katho?

Bibiler vachanema padacha Dev Ephraimen bhoolokoni, vachan kacha, (Hosea 11:8) Ephraim thon Ma kukan chonaku? Yisrael thona Ma kukan chetikaru? Adman kidoju thon Ma kukaru? Siboyimen kidoju Ma thon kukaru? Mar dall badalagich, Maar Mann khamer hathayenijthra balricha.

Maar premer Dever beptavo Dev apanen kannai bhooleni. Dever vagathema apanen chavnujako seji ach cheejevun dacha. Dever vagathemaj sejini samor karacha. Thu araj kidojethi Ann kelinokoni jathra jadaj Dev thona ghano ashish karacha.

Ajji jada dhyan karen pado Yesaya 43:7 Mar mahima vasu Maa srushti kidojako Maar naam padmelejako seni balamanga. Maaj vunen kidochu, vunen pedakidojako sada Maaj.