Oct 31 – Ekta Rajyo Shakti te!

1Corinthians 4:20 rajyo Isor laga kotha pora nahoi hoilebi Shakti pora ase.

Charles Spergeon ke najana manu toh ekta bi nai pare jun hi ekta bhal Isor laga kam kura ase. Tai laga prachar khan tu bishi tagot thaka lag thakishe. Ekbar, ekta manu pora taike hudishe ki tai laga prochar laga togot laga ki karon ase. Itu te Charles pora taike tai laga office tu dikhaishe aru pichete taike alag ekta room te loi jaishe aru koishe “itu room pora hi ami ke tagot diye”

Itu manu bhabna kurishe kinika ekta room pora hi manu ke tagot dibo paribo. Jitya tai sob phine saishe, tai dikhishe 40-50 manu ghutna te thaki kene prtahana kuri thakishe. tai khan prathana kuri thakishe, ‘Isor apui laga naukar ke cholabi tagot pora aji laga prachar te. Apuni laga kotha hi tai laga muk pora kobole dibi aru apuni laga achurit kam khan dikhabi.’ Charles pora koiishe, itu hi ami laga Shakti ase, itu pora hi ami ke tagot diye. Itu pora hi amike jui nishina shaktidiye.

Prithibi te hazar ta kisim laga dorom ase, sob dhorom te tu hosa aru budhi thakibole hi shikai. Hoilebi Christianity tu hoile Isor laga Shakti upor te hi koi. Itu karone paul pora koi, 1Corinthians 4:20 rajyo Isor laga kotha pora nahoi hoilebi Shakti pora ase.

Tagot aru Shakti hi lagi ase apuni ekta jitya laga atma laga jibon thakibole nimite. Achurit nishan khan dikhabole lage ki Pormeshwor hi Isor ase. Muri kene uthia tu janibo dibole lage ki Isor tu zinda ase dey koi kene. Jisu tai laga chela khan ke ministry karone napotha agote, Jisu taikha ke pobitro atma laga Shakti napa tok rukhibole dishe. Acts 1:8 jitya apuni logote pobitro atma ahibo, titya apuni khan Shakti pabo, aru apuni khan amilaga kotha ke Jerusalem te, sob Judah laga desh kahan  te, samariate aru itu prithibi laga sob jagate koi kene berabo.

Pobitro atma jun hi Jisu Krista ke atma aru Shakti pora bhorta kuri dishe aru itu laga Shakti pora hi chel;a khan ke bi achurit kam khan kuribole dishe.  Tai khan bi tan hoi kene hi kobole parishe ki Jisu Krista hi Isor aseeee. Aru tai khan bi Isor laga kotha janai dibole tai khan bi achurit kam khan aru nishan. Oh Isor  laga bacha khan, rukhibi Isor laga Shakti nimite, sobse uncha tai ju hi apuni khan ke chuni she atma aru Shakti pora (Isaiah40:31

Aji bhabna kuribole laga pobitro kotha tu hooile  Luke 24:49 aru ami laga pormeshwar baba ki pathabo koi kene kosom khaishile, itu ami nije pathadibo. Utu shakt upor pora apuni khan logote naahia tok apuni khan Jerusalem te rukhi thakibi.