Oct 27 – Sobjagate!

John 4:21 Jisu taike koise, “Biswas koribi, maiki, ekta hmoi ahibole ase jitya manukhan isor ke itu paharte bi parthana nakoribo aru Jerusalem te bi taikhan prathana nakuribo.

Itya laga homoi tu inika ase ki ami khan Isor ke tu kun jaga pora hoilebi sheva kuribole pare. Poile purana niom laga din te tu, ekta thik jaga hi thakishe Isor ke sheva koribole nimite. Kunuba Israelites khan tu hoile mount samaria te hi sheva kuri thakishe. Kunuba khan tu Jerusalem laga mondirte sheva kuri thakishe. Aru itukhan jaga hi thakishe sheva kura laga.

Notun niom te ahishe koile tu, Isor pora iku jaga ke bi dihai diyana sheva kuribo karone. Hoilebi tai ki dihaishe koile tu hoile kinika sheva  kuribo lage koi kene.  Apuni khan tu tu atma logote sheva kuribo lage koishe, aru hosa mon aru dimag ke loi kene sheva kuribo lage. Aru itu hi bishi zaroori ase.

Purana niom laga din te tu, Israelites manu khan tu khan tu khali sheva kora jaga ke hi zaroori bhabna kuri thakishe. Aru itu jaga ke hi taikhan sheva kura nishina hoishe aru  ek homoi te Isor ke bi chari dishe. Aru itu karone Isor pora itu mondir ke biya kuri dishe.

Amikhan laga Isor tu manu khan laga hath pora bana mondirte tu nathake. Pobitro kotha te koi, 1 Cor 3:16 apuni khan najane apuni khan Isor laga mondir ase aru Isor laga atma apuni khan bhitorte thakiase.

Apuni hi Isor laga mondir ase.  Apuni pora prathana aru sheva kora tu hoile apuni laga atma aru hosa mon pora hi ulabole lage. Isor pora apuni khan ke khushi pora sheva kuribole laga homoi dishe, itu apuni khan jun jag ate hoilebi Isor ke sheva kuribole pare, kile koile Isor tu sob jagate hi ase. Apostle paul pora likishe, “ami icha kure ki manukhan sob jag ate prathana kure, tai khan laga sapha hath utha kene, iku bi gussa nathaki kene aru pura Biswas pora.” 1Timothy 2:8 isor laga kotha tu kimana bi hosa ase, likhi kene thaka ki ‘ekta homoi ahibo Isor ke sheva kura laga sob jagate’ aru aji laga homoi te bi itu hosa hoi kene dihipai.

Jisu Krista ke sabi. Tai ekla ulai jai kene sunsan jag ate prathana kuribole jaishe (Mark1:35). Tai hodai din jongol jagate jai kene prathana kurre (luke 5:16). Tai paharte jai kene prathana kure (Lue6:12) tai mon di kene gethsemane  laga bagan te jai kene prathana kure (Luke 22:44)

Isor icha kure ki apuni khan prathana kure. Tai apuni khan ke mon aru atma di kene prathana kuribole bisare. Kunaba manu tu matha niche kuri kene prathana kure Exodus 12:27. Kunuba manu hath uthai kene prathana kure Leviticus 9:22 luke 24:50kunuba tu swag te sai kene prathana kure Psalmsa 25:15,Acts 7:55 aru kunuba khan tu muk mati te girai kene bi prathana kure Gen 17:3, luke 17:16

Oh Isor laga bacha khan kote prathana kure aru kinika prathana kure itu zaroori nahoi. Hoilebi ki zaroori ase koile tu apuni khan laga atma, mon tu hosate aru Biswas thaki kene hi sheva aru prathana kuribo lage. Apuni ekta sapha mon loi kene prathana kura tu hi Isor pora huni bo.

Aji bhabna kuribole laga pobitro kotha tu hoile 1 Timothy 2:1 ami khan laga Isor Jisu Krista ahbo laga bhabna kuri kene aru tai laga usorte amikhan iki logote joma hobole laga bahban kuri kene ami apuni ke koi ase amikhan laga bhai kokai khan.