Oct 21 – PASSIJAN DO MANDRAN!

“…bindo hen mayang mar delih a tiki passij taramtaman umdrenglai” (1 Korintia 13:11).

Passijanji abaran saring mandranji abaran bzgardana daku. amben janang passijangji abara-lingan dakulaben, angante amben passij dakulaben. Jajzngante ate man’oihdam ordaran aganijgij-ling saring. Bindo bogad passijdage abara lumle dakuleden a surdaten sikoija, ordaran a d’ongan adjae.

Anappai Pol idolle, “Hen passij dakulih adnang passijan ambrij hen berrenai, passijan ambrij hen ogandilai, passijan ambrij hen ogallai. Bindo hen mayang mar delih a tiki passij taramtaman umdrenglai” (1 Korintia 13:11).

Passijanji angante dirgale hatenji adnang ditenji do gunteji. Kan mabrij aninji ahatenanji adnang dilen ijaja yamling hatenji orde kzntalan yamling aninji hatenji man’oihdage gijtateji. Bindo, bogad surda maranji ahatenanji adnang gunlejiden, kun ate ganaroidage aberna butente agijteji amandranji. Kun ambrij, janggarda mandrengna lingan janang amben pede gunlaben. Bindo, bogad amben janggarda lingan amarantabenan adnang galulabenden, kan ate Kitungan adukadae po?

Angante amben passij dakuaben, amben passijan ambrij aberling. Bindo angante amben surdalabe, amben ogandele bernaben dete, ganugu do panemengan batte.

Bibolan gamte, “Iten asan gamlenden butente arduban maih gate anin ranoitad bernan abmele er galam na, gamlenden anin aresasijan maih. Bindo radu janumjuman amayang mandranji apsele na. Aninji banangsan do anerszn abansaben asan anukkan batte a ganoigoi-damanji rahangleji” (Ebri 5:13,14).

Aman passijan ambrij ogandite po ateng mihnum Kristumar adelaman atiki janang? Agalamtepo iten passijanji anogandee? Passijan auan ayirtaih abmele omdile dakuten ijaja pedde pangtai do jumtai gamle. Passijan adgalame amurda baranji aua maran ambrij, anin adane, anin abaran do aganugubaran.

Kun ambrij, ateng mandranji ordaran lingan magadling dakutenji ordarlingan, er galamlabe yan asurda do ganugu ajanggardan anabsittanji do Kitungan ataniytianji dakutenji. Anin adnogandieji ruangan adaneben abmele bindo aninji ordarlingan magadling dakuji. Tanahimdam Kitungan a onagji, “Anten asan bogad amben Kristun ampara anabdznan delenden, uante Kitungan a jandrumsengban Kristun a gobgob daku, tetten itente a janabanji daku, antate saijba” (Kolossi 3:1).

Kinolbe absele: “bindo yante gamle tanimyim lingan janardin opungan opungle kuddub janabanji abmele Anin amang lingan anlen mayangdam tenbe. Anin b’oban na, Kristun” (Episi 4:15).