Oct 20 – AUKKAN DO UKKAN!

“…anlen gardan saring dunglen, uante a darakuna lingan garberan ukkale, tetten bo aloban goban goble ayengan a insalonji rukkulenji aninji a d’ong anlen bernan a opunglai” (Anappai 16:13).

Anappai Pol dile-tordong aloban garber-ling dakuneten. Ateng mandranji abrij-ling yirraiji kun manegba. Aninji yirraiji engale akalkalanji dunglen yirte do danukan saring sanabyum hangteji. Anten asan, anappai Pol kun amaneng hangdramle garberan sattanted abmele bindo hangan janang atiyben abmele.

Jisu Kristun laywmna dinna lingan a tam anukkan ambrij sanenpwrsobasing lingan ganeten (Luk 4:16). Anin a tam ukkan ambrij dungan dungle Jito bwrban yereten (Luk 22:39). Jisun bangsa bangsa lanuman lumle (Anappai 10:38).

Kan ambrij abukkanaben orde aukkatenben anlendaman ate. angante baranji abukalen lumtabe, kan ate enegoi dakute. Jajzngante amandranji galamle janangan pintun lumteji angante danukan yirtai tikki aninji er galamlabe lumlai kan ambrij gamteji.

Dessa-ling-len, enegoi er-bangsa ate gijtabe gahil maranji, kani kuni agamtenji, danusanji asaitenji bzngardanji ate, duaih baralumle, poseberanji, er bangsa beranji do joldaberanji berlen kan ambrij. Kan ambrij ukkanji mandranji a d’ong abs’ite.

Anten asan, bangsa anukkanji abukkanaben dete. rayiltagalda diling kznkznan kznle do singkzndrale bangsa abukkanan. Bogad amben kan ambrij alumleden, kanina ate a tam anukka dete ogajanang orde uantejanang ayirlenden kan ambrij lumba. Kan abukkana manarid-lingan urungtabe. Jajzngante amandranji Bibolan akznol abukkatenji. Yan asurda abukkana kan ate!

Adiaran agirjana janang ate baralen. Galjimijtub atiyben janang ate baralen gamle ukkale. Kitungan amang adernaben abukkalinanden, kan ambrij alumleden erahid tagoran agijte.

Sonuman duaih baran absuilangten mandranji saring. Anappai Pol idolle, “….Kani a ordaran a tam monnan ambrij, bar riangan a danegodan a jaran, manan, ayengan a janggardan nami banaih er mannen a onanji amang lingan barate” (Episi 2:1). Tanahimdam Kitungan a onagji, bangsa anabukkan-lingan hanaba do amben daina ahangte!

Kinolbe absele: “…Bar Kristu Jisu lingan Anin ampara anrukku abdzlalen, do ruang lingan Anin ampara anrukku abgoblalen” (Episi 2:6).