Oct 19 – ABOJ’ELEN DO M’ENGNAN!

“…aninji kuddubanji bo darakuna lingan aboj’elen dakulenji” (Anappai 2:1).

Anappai maranji adnang bo surda m’engnan hanangan dakule, kun ayam-lingan Marid Janggardan ajanabab yirrai, kun ayam-lingan tabme pwrardanji Kitung-lingan yirraiji. Kun ayam-lingan aboj’elen abara-linganji asan. Bibolan gamte Pitoron ahangan batte yagi ajar mandranji derenji (Anappai 2:41).

Amben agalamtepo bo surda baran abmele? Bibolan gamte, “Bindo Pitor, bzgarda galmui mandranji ampara tanangan tanangle….” (Anappai 2:14). U’u. galmui mandranji anin batte boj’elen atanangleji garberlingan asan anin hanangan tiyle anson. Kan asan aninji daina batte anteng pwradanji labamleji.

Iten asan nami mandrengna hanang agasa manglingle? Iten asan pwrardanji yangle adraptibe sanaisaile ambrij? Iten asan anlen daina adhangbe? Iten asan Kitungan d’ongle Kitungan aboantanji batte admainalangne? Gamlenden ijajated bindo tanimhiman agasa asan, buhang tanurdun do janggardan batte amaina. Tanimhiman do sanabyun anabkalkalanji asan adea. Anlen Gamang-Kitungan amang agijgijben dete. ogandile agijba pisirdianji abo maina lingan dakutenji.

Kan ganabdelan adnangna mandradaman, Kitungan abmainale. Anin mandran a d’ong gabdele gamete, “Anlen anokke mukka-len ambrij, mandran sabjanete”. Kun aboj’elen ruang-lingan saring yirrai. Angante Kitungan amang garberle, Jisu gamete, “…engale anlen aboina” (Jon 17:22). U’u. kuddub ruang-lingan aboina do aboij’elen dakuji. Absittaben asan, Gamangtungan agarberan gamte, “Rajam-Nam yeraite. Engale ruang lingan ettele ordar lingan itsum-Nam ojoraiete” (Mattiu 6:10).

Ateng jabanji daku music abmele. Bindo, darebdingan do parepedan raidingan do etigoi bzgarda bzgarda janabanji daku kznkznan agadeleben abmele. Kun kznkznanji abm’oihte j’e-elen. Kun ambrij, d’ong-ling-len janang bzgarda bzgarda janabanji daku do abaranji tambardika dakuji, kan kuddubanji anruku lumteji mailing.

Tanahimdam Kitungan a onagji, Kitungan abmele bo surda abaran alumte, aboj’elen Kitungan batte adakulenanden do amandranji batte. Aboj’elen dakunaba. Bzgardanji abmele darakuna atiydong. Diletordong aboj’elen dakunaba.

Kinolbe absele: “…man’oih-hen badrijba, yante gamle amben aboj’en dean dele, abo tanimyiman dakkuan dakkule, abo anogandin ogandile, abo pwrarda lingan a maiten” (Pilippi 2:2).