JULY 05 – Ekla hua sapha!

oshua 1:5 Joshua jiman din tok apuni jinda thakibo kunbi apuni ke harabole naparibo. Ami jinika Moses logote asile thik inika hi ami apuni logote thakibo. Ami hodai apuni logote thakibo; ami apuni ke charikene kitya bi najabo.

Isor para amikhan ke dangor dangor saman khan diya para toh tai ami khan logote thakahi dangor ase. Kun alag bostu bi tai thaka nishina toh mitha aru shakti toh hobo naparibo. Jisu krista itu duniya te aha tu hoile amikhan logote hodai din thakibo nimite hinahishe. Mathew 28:20 Aru ami apuni khan ke kiki hikaishe taikhan ke itu khan sob hikabi. Aru ami apunikhan logote sob homoite thakibo, AMEN! Itu kua tu hoile hosa para bi isor tu amikhan logote ase.

Ekta bhai toh hoile Brahmin jati laga thakishe aru bishi digdar paishe Jisu Krista ke lobole. Ekdin toh tai laga ama baba taike hudishe, “amikhan lobo na Jisu Krista lobo?” Tai bishi thanda para koishe, “Jisu Krista.” Jitya hudishe aro saman khan iku lobo na nai mati bari khan, titya tai koishe Jisu Krista hi ami karone sob ase. Itu huni kene tai laga ama baba tu gussa uthi kene tai laga kapra bi sob phatai kene khedai dishe.

Jitya tai ekla rasta te berai thakishe, tai Jisu Krista laga awaz hunishe bishi sapha para. Jisu koishe, “bacha ami apunike ekla nacharibo.”

Luke 1:28 Utu dut ahikene taike koishe, “kushi paikene thakibi! Isor apuni logote aru sob maiki khan majete Isor apunike bishi asis dishe.” Exodus  3:14 Isor koishe, “ami Ami ase. Itu taikhanke kobi: Jun laga naam Ami ase, tai amike apuni khan laga usorte pathashe. Itu Isor tu kitya bi badli nohoi aru apuni khan logote tagot hoi kene thake. Itu karone hodai din tagot   thaikibi mon te ki Isor hi itu tagot tu apuni ke diase koi kene.

Raja David bi janishe Isor tu tai logote thakishe. Tai nijor ke tagot kuri loishe itu koi kene ki tai ke kitya bi hilabole naparibo kile koile tai tu hodai din Isor ke agete rakhe, tai itu bhabna kile ahishe koile tai jane Isor tu tai logote hodai din thake. Psalms 23:4 aru ami moria laga chaya laga rasta te jailebi ami bia khanke bhoi nalage; kile koile apuni ami logote ase; apuni laga khuri aru apuni laga lathi amilaga mon dangor kuri thake.

Aji bhabna kuribo laga pobitro kotha tu hoile Mark 16:20  chela khan jai kene itu sob kotha khan sob manu ke kobole lage, aru tai khan bishi achurit kam khan kori kene dikhai ase aru Isor tai khan logote kam kuri ase.