Oct 10 – Nehemiah aru mana kura!

Nehemiah 1:11 Itya ami laga prathana ke hunibi aru apuni laga sob naukar khan laga [rathana khan ke hunibi, jun manu khan apuni khan ke sonman kuriase. Aji laga din te ami ke jitibole dibi aru raja ke ami uporte morom ahibole dibi.

Jitya apuni Isor karone dangor kam kuribole ulai, apuni khan hodai din hi mana kura lok pabo aru bishi dukh laga din dikhibo. Judi apuni iku dukh napai apuni laga ministry te toh ekbar nijor ke hi sabi. Ekta ministry te dukh samna kuribole nai koile utu ministry tu bishi age najabo. Satan tu tagot thaka ministry ke hi rukhai aru dukh inika khan ke hi ani thake.

Bishi manu uthishe Nehemiah laga khilaf te tai jitya Isor nimite mondir banabole shuru hoishe. Dushman khan bishi lora kurishe. Nehemiah 2:10 hoilebi Beth-Horon nagar pora Sanballat , aru Ammon desh pora Tobiah, junkhan sorkari sahib khan ase, tai duijon amike koise poila pora kinba manu khan ani kene Israel laga manu khan laga bhal nimite kam kuribole lagise aru tai khan laga bhabona khan bisi kara ase.

Hoilebi itu homoi te hi Isor tai khan logote khara hoise. Aru Isor manu khan ke bi Nehemiah logote khara kuribole laga banai dishe. Itu manu khan bishi uksuk thakishe Isor ke daan dibole nimite tai khan nijor ke bi bhabna kurise ki tai khan bi Isor laga kam te hath dibo.

Oh Isor laga bacha khan,apuni khan ji hoilebi kuribo paribo mon te thakibo lage isor laga kam kuribo nimit. Jitya apuni ji hoilebi kuribo Isor laga kam tu Isor pora titya hosabi apuni laga ministry te dangor kam kuribo. Itu karone kitya bi bhoi aru alchi nahobi apuni laga ministry laga kam te.

Jun manu bi manu laga atma bachabo nimite kam kuribo, it utu zaroor ase ki satan pora inika manu ke hi digdar dibo chune. Jitya apunni Isor karone dangor kam kuribo, Isor laga dushman pora apuni ke Mazak urabo aru apuni laga kam rukhabole kuribo. Tai khan pora apuni ke  niche dikhabo itu koi kene ki “itu ministry pora prithibi bodli hobo? Bishi ministry khan inika hi giri jaishe aru itu nishi na iki apuni khan logote bi hobo.

Nehemiah laga dushman khan pora tai ke bishi dukh dishe taikhan pora niche dikhai kene thaka tu, Nehemiah 4:3 Tobaih tai laga usorte khara asile aru taibi koise, “taikhan kinika nisina bera banabole paribo? Ekta sial janwar bi itu ke dhakai kene girai dibole paribo.

Apuni khan jane Nehemiah pora ki jawab dise jitya tailaga Mazak urai thakishe? Tai sob kotha hua nimite  parathana kurishe aru tai laga dukh khan sorom khilai diya nimite kurishe. Oh Isor laga bacha khan apuni khan bi  inika prathana kuribo janibo lage.

Aji bhabna kuribole laga pobitro kotha tu hoile Nehemiah 13:14 oh ami laga Isor ami apuni laga mondir aru itu laga puja khan nimite kiki korise itu ke napahoribi.