Oct 10 – NEEMIYA DO A KANUDIN!

“…. Bar garbertam do, nami boanta-Nam a baran abojoraia; Boanta-Nam kan amandran a ganijgij lingan asuyeman hangete” (Neemiya 1:11).

Angante amben Kitungan abmele surda baran alumte, enegoi ateng bernanji yirtai do abladnaben asan. Bogad amben ijaja anabkalkalan adhanglenden, ambendaman abmele aogandeben dete. Kitungan a bara-lingan anabkalkalan ate yirtai. Sunuman pantai anabkalkalanji baraling-ben do adkadab-ben abmele.

Angante Neemiya Kitungan asarebasingan gutul-le ateng mandranji asangemleji do Jerusalem a kuddub manengba dakuleji. Asangele kani kuni gamleji. Neemiya alangkalen ateng asangem-maranji dulinaiji. Bibolan gamte, “…Israel maranji a banangsan abmeben asan bo madran yiraiten gamle badrableji” (Neemiya 2:10).

Bindo, kun ayam-ling, Kitungan anin amppara dakule. Anin gudingle mandranji aj’ee-ling anin ampara atanangben asan. Mandranji Kitungan atimangba tiydamlen tananglaji a baran abojoraiben asan. Aninji daman tiydamle surpiddamlenji.

Tanahimdam Kitungan a onagji, amben osailen adakunaben dete itejanang Kitungan a d’ong atiyben abmele kan ordar-lingan abojoraiben asan. Angante amben Kitungan amangba agarberten, Kitungan baraling-ben bo surda daina tiytaben. Anten asan, baraben abmele akudindongne.

Angante mandran anablun ahangben itsumte, sunuman a d’ongan kun adennan saring gadluben asan oskailen dakuten. Angante amben aoskaiten Kitungan a bara alumben abmele, Kitungan asangem-marji mangbaben yirtaji. Aninji ma’agantabenji, “baranam batte ordran bandatenpo? Ateng Kitungan aboantanji dunglinaji kun ambrij aman saring detepo.”

Asangem maranji Neemiya a d’ong abdukaleji mana’angan do kani kuni agamlenji batte. “Kan ayam lingan Ammon bai Tobiya anin adamban dakule, Bar anin gameten, Itente aninji gutulteji, antate bogad abo buran daijlenden, etteden anin aninji areng kantin abaldingte” (Neemiya 4:3).

Amben agalamtepo Neemiya iten lumeten aninji erandih agamleji adnang? Anin garberneten kan kudduban mana’ang maranji, anabkalkalmaranji, do duaihmaranji amangba ayirlaihji apsele. Tanahimdam Kitungan a onagji, kan ambrij amben janang agarbernaben dete.

Kinolbe absele: “E Kitung-hen, kan apsele d’ong-hen ayimih; Bar hen Kitung-hen a s’ingan do tette lingan a ganaangkilan apsele itente lumlai, kun a kuddub bangsa bara-henji gosodle szddong” (Neemiya 13:14).