Oct 08 – ARENGAN DO PARDURAN!

“Ayengan arengan saring amben ganadgadan a dele, do ayangan a parduran saring amben ganaigaian a dele, kan arengan do kan parduran amangban gijgijba” (Jisaya 51:1).

Tumadgij-mar Jisaya ‘sattang Ayengan arengan saring amben ganadgadan a dele kun ate gijgijba gamle adgamlangne bindo ayangan a parduran saring amben ganaigaian a dele gijgijba gamlante.’ Kan bagu berna janggardadage do ordardage aberna gadlamlangte. Bibol-lingan bagu karukadanji aberna gijtabe. Aboi ate hangan saring akarukudan do anb-bagu ate kalobori arakadang lingan saring janggardadage akarukudan.

Nikodimos Jisu a d’ong gijle ualeten, “Mandra talaibalen adnang yan gamle karudkudan rapti dete? Anin aboi saring anab-bagu tara a yangan a darakuon lingan ganan ganle karudkudan rapti dete po?” (Jon 3:4). Jisun jalangeten, “Itente d’ongan saring karukudkuan dele, antate d’ongan na, do itente Janggardan saring karudkudan dele, antate Janggardan na” (Jon 3:6).

Jisun aoblingeten aberna karudkudan sattang abmeleted bindo karahidan janang abmele. Aparangtan ate d’ongdage akarahidan do anab-bagu ate pintun batte akarahidan. Anab-bagu akarahidan ate togi-s’ing-lingan gadlamlangte. Jisaya gadlamaiten bagu aberna abmele karudkudan do karahidan. Kitungan gameten, “U’a-ben Abraam d kudbenten Saran a d’ong gijba; Iten asan gamlenden angante anin anson dakule, seletten Hen anin a d’ong gudinglai do absitta-an absittale ateng birindan abmelai” (Jisaya 51:2).

Amben Abraam saring ayirlai. Abraam U’a-ben dele, kuddub derna-maranji. Lugaran itente amben agaile antate Abraam ate. Kan kudduban U’a-ben Abraam saring, kuddub israelanji yiraiji. Nami, amben janang Janggardadage a israelenji do anten asan amben agijgijben dete uan saring gagadan yirtai gamle.

Bibolan gamte, “Ayengan Arengan d’ong-ben amdungeten, Anin a d’ong amben a karedale, do ayengan a Kitungan d’ong-ben kudeten, Anin a d’ong amben ardele” (Bagujuanaber 32:18). Kani a Kitung d’ong-ben karudkudan tiyle; Arengan d’ong-ben amdungeten, Arengan itente Janggarda mandrengna tiybenten, Arengan d’ong-ben gijdale, madridle do d’ong-ben gabdele do ablule anablu arengan batte.

Abraam a d’ong U’an gamle aguding-ben asan Israel maranji boi boi man’oihdam. Bindo anlen ate Tabme anosai-lingan saring Abraam anabsittan batte hanglaben ajzbjzb-beran ambrij. Argalda ayaman amben d’an asaite itente amben agaile lu’ungan kun saring ayangte. Kun ayam-lingan, itente amben agaijile janggarda a mandrengna abmele Kristu-amang-ling. Yan anabsitta kan ate!

Kinolbe absele: “Amben tarda ayam sikoija Gamangtungan amang lingan derderren dakunaba; iten asan gamlenden Gamangtung Jioba, tarda ayam arengan” (Jisaya 26:4).