Oct 06 – Charwaha aru bhera!

Psalms 23:1 Jehovah ami laga charwaha ase;ami aru nalage.

Apuni aru isor laga ki rishta ase? Tai apuni laga charwaha ase aru apuni tai laga bhera. Tai apuni karone bhal charwaha ase kile koile tai apuni khan ke thik pora sai aru morom bi kure. Ekta charwaha pora tai laga bhera khan ke thik rasta te loi jai, khan a diye, byas buhai aru bhal ghas laga jaga te loi jai. Aru saob pora uporte tu tai bhera khan ke bachai khatra laga homoi te bi.

Kile koile apuni khan Isor laga bhera khan ase, taike sai kene kobi, “Isor ami apuni pora napolabo, ami nijor laga rasta nabisaribo, hoilebi apuni laga rasta chunibo. Ami nijor laga khana apuni loi ja jaga pora hi khabo. Itu karone ami nijor laga khushi apuni ke dibo aru apuni laga rasta te hi jabo.”

Ekbar ekta manu ekta drama kurishe aru itu lags title tu hoile, ‘Isor ami laga charwaha’ thakishe aru Psalms 23 laga kotha ke dikhaishe. Tai bhera khan laga awaz ulaishe aru  charwaha khan nishina berai thakishe. manu khan itu drama tu bishi khushi paishe.

Itu homoite, ekta bura pastor ahishe itu jagate aru ijazat loi kene ami bi kiba kobo mon ase koi kene tai Psalms 23 tu sob ke pori kene hunaishe. Tai laga suku pora pani ulaishe. Pobitro atma pora tate thaka sob khan ke chuishe. Sob manu bi Isor laga morom ke janibole parishe.

Khotom hua pichete itu actor pora hudishe, “Pastor, ami itu taikhan ke bujabole iman drama kurishe. Hoilebi apuni tu taikhan ke khali puri kene hi bujai dishe. Itu laga raaz ki ase? Pastor pora jawab dishe, “oh sathi, apuni tu khali Psalms laga charwaha ke hi jane, hoilebi ami tu charwaha ke hi jane. Tai hi ase jun ami logote hodai din thake.”

Hazar ta rasta ase apuni icha chuni bole tu. Hoilebi, apuni itu rasta khan sob chari kene isor ke hi apuni laga charwaha chuni bi jun hi apuni ke thik rasta dikhabo. Kiman bi khushi hobo jitya apuni mon khuli kene kobo, “Isor hi ami laga charwaha ase.” Jitya Isor apuni laga charwaha hobo, titya apuni ikubi bi nalagibo. Apuni kitya bi napungcha nathakibo. Itu tu tai hi ase jun apuni khan ke charwaha jinika bhera ke thik jag ate pungchai inika apuni ke bi pungchabo.

Aji bhabna kuribole laga pobitro kotha tu hoile Psalms 80:1 ami laga kotha ke kan dibi, oh Israel laga charwaha, apuni jun hi Joseph ke dikhaishe bhera nishina; apuni jun hi duth khan laga majete thake, chamki thakibi.