Oct 03 – GANAGA-JANUMJUMAN!

“Anin d’ong-ben ganaga-janumjum-ling-ben absittate do mangba-ben saring banzmbzm rugaman absangaite” (Hanagod 23:25).

Yan abangsa anabsitta beran Kitungan gadlambenten! Aninna absittale tiylangten. Amandranji abmele Aninna kudite, saite do absittaben abmele itsumte.

Angate Israel maranji hanagod-lingan dakuleji Kitungan a d’onganji tagorle, Anin manna appailai ruangan saring ajanumjumanji apsele. Kun ate kuddubanji tunglaleji. Kun manna aninji apsele anabsittadage dakule, buteja er tuolmaran adakuad Israel maranji amangling.

Angante Eliya Kerit alonban eating sone, Anin kakanji batte janumjuman appaile. Anin jumle kakanji apanglaih ajanumjum do Jordan saring d’an gale. Angate jorda-linga d’an asarle, Kitungan Sarepta a d’ong appaile janumjuman do d’an tiyle. Angaja akaridadong Kitungan d’ongben ja sayamte. “Anten asan iten a jumai, iten a ga-ai, orde iten batte a jijiai? Gamle a kudidong” (Mattiu 6:31).

Angante Jisu Kristun ordar-lingan dakule, Anin janumjuman pangle do absittale. Kun ajanumjumanji moloi-ajar amandranji jumleji do lagule. Anin na anabsittan janumjuman na anlen apsele. Tabme Anosai-lingan ‘Janumjum’ aberna jznjzn murdam. Jisu Kristun anindaman gamdamneten mandrengna janumjumanna (Jon 6:35).

Kitungan sattan janumjumbenji absittate-ted bindo d’anbenji ja absittate. Papwr Anosai-lingan, Israel maranji a d’an Anin absittale. Israel maranji adnang d’an langa dakule. Angante Israel maranji yiraiji Mara desanba, Kitungan bandale asangda saring ragal dan. Kitungan argalaji asan areng-lingan saring d’an amdungle. Angante Jiriko gardan a d’an erbangsa dele, Kitungan Elisaya amang saring rumang baran lumle do kun d’an abangsale.

Gijba! Yan abangsa d’an Kitungan batte taniyan adelen ate! bibolan gamte, “…ayengan ad’an Hen tiytai, kunate a gaten a mandra bute dele janang, tarda ayam anga ja adnargaldae, bindo itente a d’an anin a d’ong Hen tiytai, antate anin amang lingan bo dungdamnadage dean dele er ahidan a mandrengnan apsele gutsorte” (Jon 4:14). Kitungan absittate ganaga-janumjuman-lingan. Garbera. Kitungan batte anabsittan de-ete s’ing-ling-nam ganaga-janumjuman-ling-nam.

Kinolbe absele: “Gamangtungan d’ong-ben do on-benji a d’ong okij barokij abatengte. Amben ruangan do ordaran a Ganabdel Gamangtungan a sanitta maranji debente” (Sanenken 115:14, 15).