Oct 01 – JABMOLAN DO A J’ON!

“Antatiki Kitungan gameten, Agaban do bzgarda bzgarda uabbaianji bar jabmolan a janab dile a j’oten a nebanji, ordaran a labo lingan padabete, gamete asan ettigoi na dele” (Aparamangtan 1:11).

Janmolan j’on absosole dakute. Amandrengna jabmol-lingna daku. Jabmolan amandrengna tabme ne-eban gadelte. Angale jabmolan agasa jon adakulenden, bo dernamaran anab jonetenden apwrardan mokasa maih.

N’ebanji jon tiyteji, kun ayam-lingan-na, j’o-lingan jabmolan janang tiyteji do etigoi bar janang n’ebanji karukudan deteji. Langa koloran batte, mana do jumben apseleja monna dungte ontidanji do etigoi bigrada ajannong-linganji iyte padabe. Kan ambrij aranji atengte kuddub ordar-lingan. Bogad n’eban j’o-lingan jabmolan adtiyetenden adnate’e badih.

Tanimhimdam ajote aderna maranji, kan ambrij ajabmolan dakupo ayengan ate pwrardanji abtengte ate? Bangsa Kristu-lingan adakutenan adtulabenpo, bindo Kitungan abmele pwrardanji arungbe a karistumar adeben dete. Tardam tardamlen pwrardabji apangbe adeben dete. kuddub birindanji bangsa anoblingberan abara lumben dete.

Okij, ogandiba jabmolan do ajonji abmele. Bo sanna jabmolan surda neban pangtai. Jabmolan olan, tarban, j’on do kuddub asanaisajan n’eban abmele tiyte. Yan aruman kan ate! sanna jabmolan bo surda aran abmete, egale barun egale bottol-lingan sanna muidan adimadtinan ambrij.

Kuddub jabmol-lingan amandrengna daku. jabmolan aganaga asanaisajan ajid-lingan saring yirtai. Kun n’ebanji arabrabben abmele, kun jamolan bo murdam. Yan alanga Kitungan gabdele!

Bibolan gamte, “Ruang rajaman bo sarsu-jaban ambrij. Antate bo mandran a kutta lingan pangle bwdeten. A jardin na antate kuddub jabmolanji saring boiboi sannadam. Bindo antate maranglen a tiki kuddub bzgarda uabanji saring surdale do aboi neban gadelle. Anten asan riang ontidanji a kandar linganji iytai basueji” (Mattiu 13:31,32).

Kuddub Kitungan amandranji Kitungan aberna ajabmolan mandrengna batte (Luk 8:11). Angante amben agijte jabmolan abaibolan, pwrardanji abrukute. Kristun mandrengna-lingan yirlai. Tanahimdam Kitungan a onagji, kan ate bara-ling-ben abojoraiben dete do tardam mandrengna-lingan. kun ate na bangsa j’on tiyte.

Kinolbe absele: “Bar bzgrda jabmolan bangsa sol lingan galule. Bar paddable marangle bo sua terdeng j’ole” (Luk 8:8).