Sep 23 – DRAKIYA DO A KANDARANJI!

“Hen drakiya-lanaman, amben kandaranji na. butente mang-ling-Hen dakuten, do Hen anin amang lingan dakutenai, anin aggarda j’on j’ote” (Jon 15:5).

Kitungle Drakiya-neban do anlen akandaranji. Ogandele gijba yan abangsa do eraldungdage aboina adelai ate Kitungan do anlen. Bogad kandaran manani-lingan adakulenden asarte orde kahidte.

Neban do kandaran amaina-ling, neban dile ayam tiyte, do kandaran dile ayam hangte. Ajidan, mannan, kuddub sanaisajanji d’an amaranben asan neban saring kandraba anabppaiyan dete. Do kandaranji maranteji kuddub neban saring sanaisajanji ayangteji batte. Kan ambrij, kuddub banangsa neban saring hangle, kandaranji j’aon pangtaji.

Kun ambrij, amben janang ruangan batte j’ee-ben dakuba, eteden amben Kitungdage araptin ahangte lanankaban saring. Kitungdage araptin ahangleden, amben janang gamle araptite: “Hen itdeleja lumle raptitai Kristun batte ayengan d’ong-hen rapduihten”. Kitungdage abanudin mang-ling-ben yiraite, etgoi. Eteden amben Kitungdage aberna berling araptite Kitungdage abanudin batte. Amben asuyeman batte lanankan saring barij deben dete. Do amben marangtaben asuyeman saring asuyem-lingan. mandrengna-ling-ben Kitungan aganugu alabsoben dete, eteden amben Kitungan aganugu-ling marantaben.

Jisu gamete: “Hen drakiya-lanaman, amben kandaranji na. butente mang-ling-Hen dakuten, do Hen anin amang lingan dakutenai…”. Kan jznjznmurdadam Kitungan batte abasuben, eteden amben ganugu do panemengan ahangte. Anlen rabangtabe Kitungan aboantanji, abranji saring adyergodtenanji ate, aninji Kitungan batte dakulen adraptienji asan.

Angante olan aneb-lingan dakute, kun ayam langa do bangsa gijtate. Bindo kun aolan, angante aran saring olan galute, asarte do asargijtate. Kan ate jznjzn murdadam Kitung-lingan adakunaben ate.

Angante kandaranji dakutenji drakiya batte, eteden aninji bangsa j’o abj’ole raptiteji, ayengan ate bigardanji abmele ja hangdrangan daku. Tanahimdam Kitungan a onagji, amben janang ganudingan adele amang-lingan do Kitungan abmele aj’oben asan. Tangboi mandranji saring kan ate Kitungan aitsum. Anten asan amang-lingan dakunaba do bangsa j’on abj’onaba.

Okiy Kinolbe absele: “Yante gamle man’oih-Hen mang-ling-ben rapti dakuten, do man’oih-ben barij rapti dete, kun asan kan a bernan Hen opunglaben” (Jon 15:11).