Sep 18 – GAMANGTUNGAN A D’ONG ITEN RAPTI ABYARDULTIYAI?

“Gamangtungan saring itente a kuddub banangsan hen hanglai, kuni apsele hen Anin a d’ong iten rapti abyardultiyai?” (Sanenken 116:12).

Bangsa uggaran jzjzn man’oihdam Kitung-lingan. Angante anlen a yimtabe along-uggarlen saring Kitungan abaranji, Kitungan ateng anabsitan appaitai mang-ling-len.

Daudo abmele, a jardina enegoi aberna anob-lingan dele Daudo abmele. Daudo aboi gupamemar dakule do anin a d’ong Kitungan Israelji a Raja abmele. Do kuddub ayam-ling Kitungan anin ampara dakule, erobjongdage asanayam sayamle do abdainale.

Daudo Kuddub anin ayemle surda j’ee batte Kitungan abaran. Anin janang gamle Israelmaranji ja Kitungan sanensenan tiyben dete gamle, “Angante anlen osengdam delalen, seletten Anin d’ong-len ayimlalen, iten asan gamlenden Anin asuyeman er ahiddam” (Sanenken 136:23). Anin a sanensen baran saring, yagi berna agalamba:

1. Hen senkenratai: “Hen anablu pinsamanan hamtai do Gamangtungan ahim lingan garbertenai” (Sanenken 116:13). ‘Sanensenan’ agaramgam ‘Lanimsenan’, ‘Hen senkenrale abpemengtai’, ‘Hen abpemengle ganugu tiytai ahim-lingan’. U’u, Anin jznjzn murdadam mang-ling-le. Anin manglen saring sanensenan sanaisaidam.
2. Hen sanensen kanuban kubtai: “Hen d’ong-Nam sanensen kanuban kubtai; hen Gamangtungan ahim lingan garbertenai” (Sanenken 116:17). Daudo ausaltaman saring man’oihan batte gamle sanensen kanuban kubtai. Kitungan m’oihdale kun kanuban saring.
3. Jzbjzbna-hen abojoraitai: “Anin a kuddub mandranji a temang lingan hen Gamangtungan apsele jzbjzbna-hen abojoraitai” (Sanenken 116:14). Daudo gamle Kitungan a d’ong abpemengle janzbjzbanji abojoraitai gamle, ausaltaman batte abgugule gameten.

Bibolan gamte: “Bittidam-ling-nam Gamangtungan a d’ong abpemenga, do tanartum-nam a pardi j’o tanuban batte Anin a d’ong abgugua; seletten gulumising-nam awr bittin batte barij dete, bar drakiya darakuda lingan saring rong drakiyadan larre l’ate” (Bangsa Hanang 3:9,10). Tanahimdam Kitungan a onagji, angante amben kuddub hangdranganji ahangte Kitungan amang saring, sanensenan batte abguguba. Anin d’ongben absittate.

Okiy Kinolbe absele: “Iten asan gamlenden yante gamle tordong ayam amben apsele kuddub abmele barijloge tullate, do amben kuddub bangsa baran abmele rapti abatengte, kun asan Kitungan amben apsele kuddub asuyeman rapti abawrte” (1 Korintia 9:8).