Sep 17 – AYENGAN A KITUNG SAYAMLANGTEN!

“Bindo hen Kitungan amangban garbertai do Gamangtungan d’ong-hen ablutih; Tagaldan, tamban do oruban danukkaber-henji do edana-hen Anin amangban yerteji, do Anin sarrang-hen amdangte” (Sanenken 55:16-17).

A jardina Kitungle Jisu Kristun sayamlangten. Kanalkal-lingan ayam, mandrandage anlen sanayaman saitabe. Bindo bibolan gamte mandran a sanayam hangdrangdageted (Sanenken 108:12).

Bo buhangan, Sam Jebadurai ahiman dakule, angate achoolan tatkudle, a Ua amang college a kznolben abmele lebun adakuad, gamlenden anin bara-lingan saring luluneten. Bindo kun buhangan ajuju a gardi, a d’onganji Chennai yiraiba gamete, do baran adhanghangtaben gamle. Bindo anin ijaja baran adnad-hanghangad bindo Chennai lingan a dakunaben asan hangle. Dile denan a uan baran saile dakuneten, kan kuddub-lingan amangan lebun addakuad. Do me-engnaben abmele kun garda-lingan lebun addakuad.

Jajingante a dena atikki, angate ansong haling-yireten, kun ayam dulajang do er tu-ulan dakule, ayam a mukaban saring a buhangan gijtale. Kun buhangan sorkar asakri-ling dakule, Chennai-lingan. a d’ongan gijangijle anin ogandieten kuddub akanalkalan takudte gamle. A buhangan a d’ong sandungle, bindo duka-beran, anin janang adsayamad.

Angate mandran a sanayam adhangad, a j’ee aldungle. Anin Kitungan atimangba yiraite, do edaling garbernete, turdumle. Anin a j’ee aboi janzbjzban dakueten, mandran asanayam saibented gamle. Anin galamle mandran asanayam hangdrangdageted. Anin susule Kitungan ad’ong asaiben. Do kun a dena saring Kitungan bandale a d’ongan. Abmang anin achool-lingan gonito ahanghang-mar dakule. Do Kitungan janang etigoi bo surda baran tiyle. Do Kitungan a d’ongan sayamle kuddub asanaisajanji tiyle.

Do jajaingate ayam atikki, Kitungan a d’ongan gudingle abaran abmele. Do Kitungan a d’ongan sayamle jangardage a kambo’ol hidolben abmele. Anin a d’ong ateng desanji Kitungan a hanang atiyben sayamle. Kan kuddub-lingan Kitungan asanayam.

Tanahimdam Kitungan a onagji, nami kan ambrij amben janang kanalkal-lingan adakute pede. Mang-ling-ben ja buteja agasa asayamben abmele. Kitungan a d’ong gudingba. Anin ganudingben amdangte do sayambenten kuddub kanalkal-lingan.

Okiy Kinolbe absele: “Anin amangban a garberten a tungdam jaddam maranji a d’ong bar banagge maranji a d’ong anin rabrabte” (Sanenken 72:12).