SEP 15 – KAN ATE ABBANGSABA!

“Anta saring kuddub mandranji anin adamban yeraiji, do anin Gamangtungan ampanzd aranggan barsabjaeten” (1 Raja 18:30).

Angate Eliya ampanzd aranggan gijle, a j’e-en Kitungan amang-ling anumengan dele. Amonna-lingan kun ate abangsaben abmele oskainete.

Aranggan aboi mandran do Kitungan batte armaina. Ugarben aboi aranggan ambrij, Kitungan agijgij-lingan. Nami, mandrengnaben do pwrardaben iten ambrij daku, Kitungan aganijgijle? Aldung-ugarpo daku? Kitungan batte atanurdun do manaridadarakuna abmele barsabjaben detepo? Nami, bogad amben aranggan abangsaben aoskai-linganden, Eliya a Kitung mang-ling-ben togi appaitai abangsaben asan. Arangga-ling-ben Kitungan a togi  labsoben dete.

Anabpungge kambo-ol-lingan, Kitungan Jisu Episi a ranukkun abmele gadlamlangte: “Anten asan uante saring aman galule antate ayiman ayimle abyarj’ena do abmang baran luma….” (Anabpungge 2:5). Aranggan adnadbangsalenden, kan ate jugardamdam Kitungan a togi alabsoben, kanuban ajaben. Anten asan aranggan barsabjaben do gabdelben dete.

Jajingante amandranji daku, aninji amandrengnaji adnabsadreaji, bindo bigardanji abdusaben abmele oskai-ling dakutenji. Bigardanji adanusa aninji saile dakutenji, aninji aninjina amandrengnaji galute. Bibolan gamte: “Bindo dile mandran tungjendamnete, do ettele kun rutipun saring jumete, bar ganagan saring gaete…Bindo bogad anlen tungjengdamlenbenden anlen panadradan adhangbe” (1 Korintia 11:28,31).

1903 ayam-lingan, Evan Roberts gardikur-lingan bo denna hanagodan yirre, hanangan atiyben abmele Wales desa-lingan, tuargod, Kitungan a d’ongan tadnangle gamete: “E on-Hen, aman uajanang dakulamja, tungjengdamna iteja lumben abmang. Aman abmele arangga-lingan iteja daku, barsabjaben abmele. Abamang abangsa-a, do hanangodnam susua, do hanangan atiyte ayam-ling rumangdage ate gijte”.

Attabdong Kitungan amandran, Kitungan atimangba turdumle do yagi gonta sikoija tiydanete, aldung-uggaran batte tungjengdamnete, garbernete amandrengna-lingan itente adord dakule pingbale, itente ate palangle dakule. Anin Kitungan amang-lingan ayiraitenan ate himnete do janggardan batte barij dele, erabjong-dage. A tikki angate gorjangba yireten, angate anin hanangan tiyete ranaptin batte togi labsolai. Kun soba-lingan kuddub mandranji Marid Janggardan batte barij deleji. Tanahimdam Kitungan a onagji, Eliya a Kitung, Togi amben ampara-appaiben itsumte, Nami. Aranggaben abbangsatepo?

Okiy Kinolbe absele: “Seletten Gamangtungan a togin galuan galule, sanoi kanuban, angalan, arenganji, do durdisolan jumle, do l’ung lingan a dakulen a d’an janang jalle szdle” (1 Raja 18:38).