SEP 11 – GANARDINJI ABMEBA!

“……ambendam apsele ganardinji abmeba” (Luk 16:9).

Kitungle Jisu Kristun a hanangmaranji a d’ong gamete; aninjidaman abmele ganardinji abmeba gamle. Kan aberna iten asan gamaten agalamtepo? Aninji a d’ong ganardinji abmeben asan anoblingan deleji eteden aninji erahid s’iengan ahangben asan. Agante amben Kristun abmele pwrardanji ahangben asan, amben abmele ganardinji abmeba, ordardageted, bindo janggardadage abmele, kan kuddubanji amben abmele erahid ganardinji.

Jajzngante a mandranji dakuji amang-linganji ganardin agassa do beramaranji ja agassa. Bindo Kitungle gamete, amben ganardinji abmeba. Ganardin sanasai, ayengan amandran kuddub lingan gadlamlangte, andruku garbernabe do girjaba yirtai anlen ampara. Bindo butten ganardin? Ganardin butente ganardinge dakute do kuddub ayam-ling adamba dakute. Solomon ganalaman batte gadlamaite, “Ayengan a mandra ateng ganardin abmete anin anin a san’zdan abmele lumte, bindo buhangdaman saring karran adam tanimyim gardin daku” (Bangsa Hanang 18:24).

Bo gardibuhangan kan ambrij anualberan, bo Tamil maran gamle; “kan ate sanaisai kanalkalan ayam-ling asayamben ate, bo bardika abmele s’ie abju-unle, agante a s’indrigalute adnang sayamte”. U’u, janardin gardin a gardin a d’ong iytai sayame, ayengan amandran kanalkal-lingan daku.

Bogad buteja ordardage aganijmadan asan togi-s’ing-ling sanedan delenden boiboi dukadaman abisoyo. Buteja agardin dakulenden anin danukkan uggaran batte garberte, pwrardan anablu ayangben asan.

Kitungle Jisu Kristun kan ambrij anlen abmele lumle. Buten sakai gardin Jisun ambrij? Anin ruangan yirai do kalobori-lingan a d’ongan tiyle, karahidan saring abluben do erahid mandrengna ahangben asan. Bibolan gamte; “Yante gamle buteja mandran agardi maranji apsele a pwrardan-daman umdrengte, kun saring buteja a tanimyiman surda ted” (Jon 15:13).

Agante Jisu Kristun oradar-lingan dakule, kuddub mandranji gamleji anin aboi gaggar-lebmaran a gardin do pintumaranji (Luk 7:34). Anin pintumaranji do gaggar-lebmaranji ampara dakule, anten asan Anin a d’onganji anabluba urunglai karahidan saring. Anin kuddub mandranji ampara gardimarge dakule.

Tanahimdam Kitungan a onagji, amben akuditenpo buteja agassa gamle? Ajardin-na Kitungle Jisu Kristun, sanagalmar do anlen abmele aoganditen amandran. Amangba pwrardanben janatidam.

Okiy Kinolbe absele: “Tanimyim maran anabpara dernadage, bindo asanggem maran a kurkurtaman janoldadage” (Bangsa Hanang 27:6).