Sep 10 –E KITUNG, D’ONG-LING-HEN GARDZA!

“E Kitung, d’ong-ling-hen marid uggaran gabdela, do along-ling-hen erztna janggardan barokij gardza” (Sanenken 51:10).

Tene Raja Daudo Kitungan a d’ong gadlamte uggar-hen madrida gamle. Kitungle ayengan Ruangan do Ordaran gabdele, oyungan do angaitan, jajzngante ate ganijtage do jajzngante ate erganijtage. Bindo kan ate jznjzn murdadam aberna uggarlenji bargardzben abmele.

“Elohim” gamle Kitungle ahiman daku, agaramgaman ‘Kitungan aganabdelan’. Aparamangtan Elohim ruangan do ordaran gabdele (Aparamangtan 1:1). Kan kudduba gabdele berna batte. Agante Raja Daudo gijgijle Kitungan aganabdelanji, kuddub langadam do bangsa gijtale. Kun ambrij a udggaran janang gijgijle.

Daudo galamle mandran aduaihan ordar-lingan barijdam, do auggar-lingan anogandiji duaihbaran sattang alumben. Agante Kitungan mandran audggaran amadridben tordong ayam-ling oskaidam dakute, mandran ordardage amanadgad-lingan sattang m’oih-ling do erdika-ling adakunaben itsumte. Iten alumben dete kun ate erlumlabe eresumdage abaran lumte. Pintu uggaran anogandin enegoi daku do manaridan a d’ong sadgaile kuddub ermaridan abaran alumben itsumte.

Anten asan Daudo, edaling garberneten; “E Kitung ayengan ruangan do ordaran agabdele,  d’ong-ling-hen marid uggaran abgabdelepo? Tabme uggaran duaihan ate abaldungle abbargadzapo?

Marid uggaran kan ordar-lingan bangsa do jznjzn murdam. Ajardin-na manarid-lingan adakunaben abmele marid janggardan mang-ling-len anappaihan dele. Amben Jisu Kristun amihaman batte manaridan adele do aberna batte barganardzn adele. Kun batten, uggarbenji manaridan do Marid Janggardan batte marid adele.

Korintianji aranukuling, ateng mandranji er-marid-ling, jundarda-lingan, jumburan, joldan do abrunan-lingan dakuji. Bindo Kitungan, agante Anin aninji a d’ong gudingte, asuyuman batte, marid uggaran amang-linganji gabdele do gardzte.

Tanahimdam Kitungan a onagji, Marid Janggardan amangba edanaba, ayengan kuddub ranaptin batte uggarben gabdele do maridte domanarid-lingan gardz-benten.

Okiy Kinolbe absele: “Bindo angante Janardin a Janggardan yertai, seletten Anin kuddub janardi lingan abanjengtaben” (Jon 16:13).