SEP 08 – M’OIHNABA!

“Dile tordong m’oihnaba” (1 Tessalonikia 5:16).

Man’oihan karukudan saring yirtai, ayengan aberna Kitungan jzbjzbeten a pasijanji abmele. Man’oihan ruanangan saring ataniytiyan do tarda-ayam dakute.

Kan ordar-lingan, mandran aitsuman ambrij dakute munan cinemaba, jundardan, do agale muidan ma’na janaban saite. Atanakud-lingan, agale muidan adang-lingan kahidle, kun ambrij mandran janang apintun batte kahidte. Kan ambrij mandran amandrengna sani’edan do karahidan dete.

Bindo Kitungle, aninna d’ongle abm’oihte amandran. Anin anablu aman’oih do man’oihan tiylangte. Kan ate aboi man’oihanna, aten asan anlen abgugule do senkenrale kznkznan do tongsengan batte lumben dete. man’oihan batte kun ate dete.

Agante anlen oganditaben Kitungle abmele man’oihan batte barij delangten. U’u. Anin bangsadam, Anin radudam do ranaptidam. Anin ganugu-lingan panimingdam. Do Anin d’onglen ateng timyimlangte, kun asan Anin eaitensailen, agante anlen pintu-lingan si’etlai. Yan a bangsa Kitungle, ayengan a d’ong tiyle anlen abmele do d’ongle ablule? Agante Daudo sanenken-lingan gadlamaiten, “Seletten Gamangtungan amang lingan pwrarda-hen m’oihte do Anin anablu lingan erdikate.” (Sanenken 35:9).

Tarda-ayam Kitung-lingan m’oihnaben abmele dakunaben dete. Do kznle a d’ongan abguguba. Agante amben j’ee-ling-ben darakuna atiyte abguguben do senkenraben abmele, do atiydamten aganugulingan do apanuminglingan, amben ateng a m’oihten. Bibolan gamte: “E Israel, Ganabdel Mar-ben amang lingan m’oihnaba; e Sion a mandranji, Raja-ben amang lingan erdikanaba.” (Sanenken 149:2).

Anappai Pol gadlamlangte: “Dile tordong Gamangtung lingan m’oihnaba, barokij hen opungtai do, m’oihnaba!” (Pilippi 4:4). Anin gadlamlangten do man’oihan abmele: kan ate Kitung-lingan abahiraling a man’oihanted. Bindo kan ate Kitung-lingan a man’oih. Man’oihan Kitungan atanurduling. Man’oihan dungte agante Kitung-lingan dakutenben.

Tanahimdam Kitungan a onagji, Kitung-lingan a m’oihnaben abmele sanengsengben dakuba. Bo hanangmar gamle Hanangber saring: “Anten asan hen imlenai do, anlen a marengmadta-len sikkoija bogad m’oihlaienden do bangsa baran lumlaienden kan saring iteja bangsa baran attiye.” (Hanangber 3:12).

Okiy Kinolbe absele: “Yante Gamle man’oih-Hen mang-ling-ben rapti dakuten, do man’oih-ben barij rapti dete, kun asan kan a bernan Hen opunglaben” (Jon 15:11).