SEP 07 – JANGGARDAN A J’ON!

Bindo Janggardan a j’on tanimyiman, man’oihan, sanabyun….” (Galatianji 5:22).

Tetne man’oihdaman aberna, agante sanabyun ahangtaben ate.  do agante anlen bigrdanji ad’ong gadlamtabe, sanabyun – gamlenden Janggardan a J’on. Kan a janggardan a j’on bagumaneng-ling gadlamlanten munan ranuku-lingan do tangsoi-lingan. Tanimyiman, Man’oihan do sanabyun kan kuddubanji aboina.

Agante amben Jisu Kristun amang agijgijte, kuddub janggardan a j’on amang-lingan arabangte. Agante amben ablumar-hen gamle Jisu Kristun a d’ong ajate, kun ayam saring amben janang anin ambrij abhanadamte. Kanina ate mandrengna-lingan Kitungan asanabyun debendete.

Agante amben Marid Janggardan ahangte, Kitungan ruangan saring taniytiyan do Janggardan a J’on tiylante. Bindo amben barij man’oihan batte Janggardan a J’on-ling Kitung-lingan atiydamtenpo? Bibolan gamte: “…E tanimyim mar-hen, aman abmele dile janab janattidage papwr do tabme j’on dakkulai.” (Solomon a Kanen 7:13).

Janggardage asanabyun a j’on ahangben abmele, amben Kitungan amanani-lingan dakunaben dete. Kitungle Jisu gamete: “Mang-ling-Hen dakunaba. Do Hen mang-ling-ben dakutenai. Engale kandaran bogad drakiya-lanam lingan addakulenden a itsumdaman batte j’on rapti ajj’oe, ettele amben bogad mang-ling-Hen addakulenden, j’on rapti ajj’oe.” (Jon 15:4).

Bo dena bo mandra dakule, ayengan amandran mandran aganadilan abmele berna oblingle, do anin gamle Kingan agassa. Bogad bo mandran dakulenden, buteja sanaisaited. Bo Kristun maran, ayengan amandra kan ate amdangle, anin amangan yirle yietengame: “Buhang, bo muidan gija labo-lingan, anin endungle dakute do adarakuna agassa, bo surda sanabyun batte. Adarakuna uan daku aman galamtepo, kuddub ganalamnam batte oblinga? Mang-ling-nam muidan ambrij sanabyun dakupo?

Kun mandra, ayengan amandran anindaman bo surda kanalakalan saring amandrengna do ersanabyun batte, kun derna buhangan aberna batte, anin gamle: “Itente aman gamle antate jardina. Buteja sanabyun adhange aganalam do abanuddin batte”. U’u, buhang-henji do tonan-henji, ‘Sanabyun’ Kitungan ataniytiy iten kanalkalanji sadgaite mandrengna-lingan. Kitungan asanabyun sattang, dile ayam dakute.

Bibolan gamte: “Rojol-j’e maran a d’ong gija do roitad maran a d’ong abmada, iten asan gamlenden sanabyu maran a tanakud j’on daku.” (Sanenken 37:37). Tanahimdam Kitungan a onagji, erahidan Kitungan asanabyun, Marid Janggardan asanayam batte. Kanina ate Jisu Kristun anablu mar-len batte Marid janggardan tiylangte janggardan a j’on.

Okiy Kinolbe absele: “Iten asan gamlenden Kitungan  a rajaman jumjumlen do gagalen ted, bindo ranoitadan, sanabyun do Marid Janggardan lingan man’oihan maih daku” (Romi 14:17).