SEP 06 – Isor laga shanti apuni khan laga mon te rajyo kuribo dibi!

Colossians 3:15 Krista laga shanti pora amikhan bhal niom khan ke cholai kene thakibole paribo; itu shanti nimite Isor amikhan ke ekta hoikene tai laga usorte matise. Aru itu nimite dhonnyabad janabi.

Amikhan ekbar nijor te bi bhabna kuris abo lage ki ami khan laga jibon tu ki pora rajyo kuri ase? Apostle paul pora kua nisina Isor laga shanti pora kuri ase? Na jhagra, biya paa, mon jula inika satan pora diya khan pora rajyo kuri ase?apuni khan laga mon  tu khali Isor pora hi rajyo kuribo lage.

Jitya Isor apuni khan laga mon te thake, titya pobitro atma bi thake aru atma laga bijon amikhan ke diye. Hoilebi jitya amikhan satan ke thakibole diye titya Isor tu biya pai aru amikhan laga baher te hi thaki jai. Aru jitya satan apuni laga mon te thakibo, titya apuni biya khan hi lok pai thakibi kile koile satan laga bijon tu biya hi ase.

Ekta desh laga sob niom khan aru aha din te ki hobo itu tai khan laga sorkar pora hi faisla kure. Aru sob itu sorkar laga niom pora hi jabo. Itu nisina hi apuni ji kuribo itu apuni laga mon laga sorkar kun ase dikhai diye. Apuni laga adot, niom khan itu sob tu Isor laga ase na nohoi? Apuni Isor pora hi cholai koile sob bhal niom khan hi hobo.

Hoilebi itu bishi dukh laga kotha ase ki bishi manu kun pora tai khan ke cholai ase koi kene iku bi chinta nai. Itu nimite kunuba desh tu bishi biya homoi te ase aru dukhiya manu laga awaz kunbi  inika desh te huni napai.

Jitya isor pora apuni laga jibo ke cholai, titya apuni laga rasta tu ssapha thake, aru apuni galti  kurile bi aru janibole pare aru sahi rasta dhuribole pare. Itu nimite Isor ke apuni laga mon aru jibon ke rajyo kuribole dibi titya apuni kitya bi galti rasta te najabo.

Judi kunuba man utu shanti pora rajyo nakore, titya itu jibon tu iku kam laga nohoi, tai kiman dhon thakile bi shanti nathaka jibon tu khushi nidiye. Judi apuni shanti laga jibon te apuni apuni laga jibon tu Jisu Krista ke cholabole dibo lagibo.

Oh isor laga bacha khan nijor ke andhera aru satan laga Chaya pora ulabo dibi. Aru Isor laga shanti pora apunilaga jibon cholabo jitu te apuni khushi hi pabo.

Aji bhabna kuribole  laga pobitro kotha tu hoile Isaiah 30:21aru apunikhan galti pora rasta laga dahina phine nohoile baiya phine jaijai se koile apuni laga piche phine pora tai laga awaz ke hunibole pabo, “itu rasta ase. Yate berabi”.